Registers van de Hollandse grafelijkheid 1299-1345

Graaf Willem III maant de kooplieden die per schip bier vervoeren uit het Oostland, het Sticht en van elders naar Kennemerland en (West-)Friesland, dat zij de verplichte tollen in Medemblik en Amsterdam niet meer ontduiken, op straffe van verbeurte van schip en koopwaar; voorts beveelt hij de bisschop van Zuden dat deze het bier op de plaatsen waar het verkocht wordt laat controleren.

De onderstaande tekst is gebaseerd op afschrift B.

Wi Willaem^b grave^c van Heynnegouwen^d etc. maken cond etc. dat wi ene tolne van rechte hebben in onsen lande, ende want men vele biers te brenghen pleghet in Kennemairland^e ende in Vriesland uten Oistlande^f ende ute den Ghestichte van Utrecht^g ende elwair, dair men ons tolne of sculdich es, so hebben wi zet onse tolne dair of intenemen te tween steden, dat es te Meedenblicke^h ende toit Aemstelredamme; nu verstaen wi dat si bi nachte zeylen voir bi dese steden sonder tolne te gheven jof dat si ander diep in comen ende scuwen dese steden om onse tolne tontfoeren, dair si hoir goed mede verboiren. Ende omme dat wi onse tolne aldus niet te niete en willen laten maken, ende wi oec den coeman niet te haestelike en willen begripen, zo doen wi te weten den coemannen openbairliken mit desen brieve ende bidden hem vriendelike dat si onse tolne soeken als si sculdich sien te doene, ende ghene andere weghe en varen noch onvertollet voir bi en varen, jof wi sullen scip ende goed doen nemen ende behouden tonser behoef, alse recht es. Ende ombieden ju onsen lieven ende ghetrouwen den biscop van Zuden dat ghi dat also verwaren doit tallen steden dair si hoir bier pleghen te vercopen, dat men scip ende goed op houde tonser behoef ten si dat si teyken brenghen van Medenblic jof van Aemstelredamⁱ dat si dair vertollent^j hebben; ende dit doet also narenstelike, wair bi dat onse recht niet vermindert en worde noch versuimt bi ju.

Ghegheven Tordrecht^k op sinte Pieters dach in ghaende oichste int jaer ons Heren M CCC drie ende twintich.