Registers van de Hollandse grafelijkheid 1299-1345

Graaf Willem III  begiftigt de kapelanij die hij in Muiderberg heeft gesticht ter eeuwige gedachtenis aan graaf Floris V, die daar werd gedood, met 30 pond zwarten Tournois per jaar uit alle hem toekomende visserijrechten in het land van Amstel; de begeving van de kapelanij houdt hij in eigen hand.

Wi Willaem^b grave etc. maken cont allen luden. Want onse lieve neve die grave Florens, daer God die ziele of hebben moit, doet bleef tote Muderberghe in onsen lande van Aemstelle, wes ziele wi altoes gharne souden doen ghedenken, ende hebben in eweliker ghedenkenesse vor siere zielen, onser ouder zielen ende der onser, in die ere Goits, onser Vrouwen ende alle Goets heylighen ghesticht ende ghemaket ^c tote der selver stede van Muderberch ene capelrie, bi enen goden ^d capellaen daghelix al daer te verdienen ende misse daer op te done als hies ghestaet es, die wise jof onse nacomelinghe gheven zullen om daghelix te bidden ende te ghedenken diere zielen vorscreven; wilke capelrie wi hebben ghedotiert ende ghesticht van ons selves gode, ende besetten daer toe in zekeren renten ewelike staende dortich pond zuarter Tornoyse^e, den groten over zestien penninghe gherekent, elcs jaers tonfanghen bi den capellaen van deser capelrien van alle onsen viskerien in onser lande van Aemstele^f, die ene helfte daer of tontfanghen jaerlix te sente Martijns^g misse in den winter^h ende die ander helfte te sente Pieters daghe in den lentenⁱ jof tote zulken daghe^j als dat ghelt van onser viskerien voirs. in vallen zal, altoes van den eersten ende van den reetsten payemente dat daer of in comen zal tote elken daghe. Ende hebben dese XXX lb. Tornoyse^k sjaers gheset ende^l setten uyt onse handen ende upghedraghen ende gheeyghent ewelike deser capelrien te bliven; ende ombieden ende ghebieden onse rentemeysters^m, baliuwen, scouten ende anders allen onsen luden die onse renten jof goit in handen hebben jof hier nae hebben zullen dat si den capellaen diese besitten zal dese dortich pond Tornoyseⁿ sjaers van onsen renten voirscreven voren uyt ontfanghen laten, sonder enich wederzegghen, tote zulken daghen als die renten daer of vallen. Ende die gifte van deser capelrien houden wi an ons ende an onsen nae comelinghe.

Ende om dat wi willen dat dit ewelic vast ende ghestade bliven ende wel ghehouden, zoe hebben wi desen brief open^o beseghelt met onsen seghele. Ghegheven in die Haghe des sonnendaghes vor sente Victors dach int jaer ons Heren M CCC vier ende twintich.