Registers van de Hollandse grafelijkheid 1299-1345

Schepenen, raad en gemene stad van Staveren stellen zich borg voor de betalingen die het gemene land van Westergo heeft toegezegd in de door dat land gesloten zoen met graaf Willem III.

Vgl. de hiermee samenhangende nrs. FR 104 en 107 in het register.

Wi scepene ende raed ende ghemeene stad van Staveren^a maken cond allen luden. Want dat ghemeene land van Westergoe^b ghesoent hevet tyeghens onsen gherechten here, heren Willaem^c grave van Heynnegouwen^d ende van Holland^e etc., alze van zulker broeke ende misdaet als si jeghens hem misdaen hebben, dat si ^f zinen scoute van Staveren^g verdreven ende siere vreende huyse braken binnen der poirte van Staveren^h, ende van alre werre die zi onderlanghe hadden tesen daghe toe, toite ons heren sgraven zegghen voirs. ende des biscobs van Zuden, tuschen dusent marcke ende twie dusent marcke Enghelche, die marke over vierich groete gherekent, ende die huze weder te maken alzoe goid als zi waren die Ottenⁱ, Ludekin, Poppen ende Volkaird^j Tavernier te broeken waren, bi den biscop van Zuden, den abt van Staveren^k, den lezemeister van Beudelwairde^l ende bi heren Pieter den deken van Mairden; zoe sien wi dair of borghe ghewoirden voir dat ghemene land van Westergoe^m voirs. jeghens onsen here den grave voirscreven, ende gheloven hem alsulc gheld als hi mitten biscop van Zuden dair of zegghen zal alze voirscreven is, dat wi hem dat betalen zullen alzoe groet als ziet zegghen zullen ende te zulken daghen als ziet zegghen zullen, het zie med monde jof mid horen openen brieven.

Ende omme dat wi dit witteliken ende trouweliken voldoen willen alze voirscreven es, zoe hebben wi desen brief opene bezegheld med onser ghemeenre poirte zeghele van Staverenⁿ. Ghegheven toite Staveren^o des sonnendaghes nae sinte Margrieten^p dach int jaer ons Heren dusent drie hondert acht ende twintich.