Registers van de Hollandse grafelijkheid 1299-1345

Frederik II (van Diest), bisschop van Utrecht, en graaf Willem III verblijven hun twist met die van Lienden en met Reinoud van Gelre, alsmede de twist tussen Reinoud enerzijds en Walraven van Benthem, Jan van Noordeloos, Gerard van Waardenburg en Stasekijn van Brakel anderzijds, aan de uitspraak van Jan van Henegouwen, heer van Beaumont, en Hendrik van Vlaanderen, graaf van Lodi, met de bepaling dat zij aan Reinoud een boete van 16.000 pond zwarten Tournois zullen betalen wanneer zij de uitspraak niet zullen naleven; als hun borgen treden op graaf Willem III zelf, Jan van Henegouwen, heer Gerard heer van Voorne, heer Jan heer van Arkel, heer Zweder heer van Abcoude, heer Gijsbrecht heer van IJsselstein, de stad Dordrecht en de poorten van Delft, Leiden en Haarlem, welke borgen de oorkonde meebezegelen.

Voor de in de tekst aangekondigde uitspraak zie nr. GE 2; vgl. voorts nrs. GE 4, 5 en 7.

Wi Vrederic bi der ghenaden Gods biscop van Utrecht ende wi Willaem^b grave van Heynnegouwen^c etc. maken cond allen etc. dat wi macht hebben ghegheven ende gheven ende ghebleven sijn van allen twiste, broke ende eyske die wi eyskende sijn die van Lienden^d ende haren helpers, ende van allen twiste, broke ende eyske die wi ende onse helpers eyskende sijn Reynaude van Ghelre ende sinen helpers op die ene side, ende Reynaud ende sine helpers ons ende onsen helpers weder op die ander side, ende voirt van allen tuyste, broke ende eyske Reynaud van Ghelre ende sine helpers eyskende sijn Walraven van Benthem^e, Janne van der Noirdeloes, Gheraerd^f van Waerdenborch, Stasekijn van Brakel ende haren helpers, ende si Reynnaude ende sinen helpers weder eyskende sijn, ane segghen heren Jans van Heynnegouwen, here van Beemond, ende heren Heynric van^g Vlaendren, grave van Lode; ende so wat hair Jan ende hair Heynric voirghenoemd dair of segghen zullen, dat gheloven wi beyde voir ons trouweliken te houden. Ende wi Willaem^h grave etc. gheloven voir Walraven van Benthemⁱ, vor Janne van der Nordeloes, Gheraerd^j van Waerdenborch ende voir Stasekijn van Brakel ende horen helpers voirseyt dat segghen te doen houden. Ende waer dat sake dat hair Jan ende her Heynric^k, segghers voirs., in enighen ponte twieden, so souden si enen over man nemen bi hare beyder wille des hem beyden ghenochde, ende met wilc horen van hem twien dat die over man over een droghe alse van den ponte dair si omme twieden, dat soude ghestade bliven. Ende om dat wi willen ene ghestade soene hebben, so hebben wi ghelovet hair segghen te houden ende te doen houden, oec so wat si segghen; deden wi des niet, so souden wi Reynaude van Ghelre gheven XVI^M lb. zuarte^l, den groten over sestien penninghe gherekent. Ende des sijn borghe voir ons: wi Willaem^m grave etc. voirs., hair Jan van Heynnegouwen etc., her Gheraerdⁿ here van Voirne etc., her Jan here van Arcle, her Sueder here van Abcoude^o, her Ghisebrecht^p here van Iselsteyne, die stede van Dordrecht^q, die poirte van Delf, die poirte van Leyden, die poirte van Hairlaem, dit segghen te houden jof die XVI^M lb. Tornoyse^r te betailen; jof dat wi Willaem^s grave van Heynnegouwen etc. ende hair Jan van Heynnegouwen, onse broeder voirs., jof II ridders vor onser elkerlijc, ende wi Gheraerd^t here van Voirne etc.^u, hair Jan van Arcle etc. ridders, jof II welgheboren^v knapen voir onser elkerlijc, ende wi die stede van Dordrecht^w etc. voir elke poirte IIII scepene, souden in comen te Woudrichem^x te leesten in ene herberghe dair ons Reynaud wisen soude doen^y ons selven te winnen, ende niet van dane te sceyde eer hoir segghen volcomen ware jof dat wi hem die voirs. pene vergouden hadden.

Ende omme die meere sekerheyde^z ende omme bede ons liefs heren sgraven van Heynnegouwen etc. so hebben wi alle ghemeenlike die borghe sijn voirscreven dese letteren open bezeghelt met onsen seghelen met onsen lieve heren den biscop ende den grave voirseyd. Ghegheven ter Horst bi Rienen^a' sabbato post Dyonisii anno XIX.