Registers van de Hollandse grafelijkheid 1299-1345

Graaf Willem III en Reinoud II, zoon van de graaf van Gelre, sluiten een verdrag van wederzijdse bijstand, met de bepaling dat Reinoud zal toestaan dat lieden uit Gelre zijn ooms van Vlaanderen of graaf Willem te hulp komen, en dat in geval van militaire bijstand de gesteunde partij de onkosten van de ander zal vergoeden, terwijl zij tevens beloven elkaars kooplieden te zullen beschermen en in geval van onenigheid ieder twee raden als schiedslieden aan te wijzen; de oorkonde wordt meebezegeld door Jan van Henegouwen, heer van Beaumont, en Hendrik van Vlaanderen, graaf van Lodi.

Vgl. het voorafgaande nr. GE 11.

Wi Willaem^a grave etc. ende wi Reynoud, sone des graven van Ghelre, maken cond ende kenlic allen luden dat wi om minne, om vrienscap ende om rechte manscap bi rade onser beyder vriende een verbont onder ons hebben ghemact, ende sijns over een ghedraghen ende hebbent gheloeft ende ghelovent in desen ^b jeghenwoirdighen brieve bi onser sekerheyt^c in goeden trouwen, ende ghesuoren bi onsen eden opten heylighen, mallic den anderen vaste te houden ende onverbreclic also langhe als wi beyde leven, sonder archlist, in manieren als hier hier na ghescreven staen. In den eersten dat wi Willaem etc. voirs. zullen helpen weren met onser macht, sonder archlist, Reynoude onsen neve, zone des graven van Ghelre voirghenoemd, die grafscep^d van Ghelre ende al dat dair toe behoirt jeghens elker mallic, so wie dat hi si; ende Reynoud sone des graven van Ghelre voirs. zullen al dus ghelike weder^e doen ende helpen heren Willaem onsen lieven neve, grave etc. voirseyd, sine graefscip^f voirghenoemd ende al dat dair toe behoirt weren met onser macht jeghens elker mallic. Maer ware dat sake dat onse heren onse oemen van Vlaenderen^g iemand ghebieden conde of mochte in hore helpen te comen ute der gravescip van Ghelren dicken ghenomd, dair en zullen wi hem niet ane hinderen nochte niemande wanconnen; ende des ghelike mach oec ^h onse neve die grave ⁱ van Heynnegouwen^j ende van Holland^k voirs. ute der zelver graefscip van Ghelren iemant ghebieden^l in sine helpe te comen, wij en zullen hem niet dair ane letten noch niemant dair omme wanconnen. Voirt so sien voirwaerden dat so wanneer wi Willaem grave etc. voirs. vermanen zullen onsen neve Reynoude voirs. ons te comen te helpe met sinen luden ende met sinen vrienden alst voirseyt es, dat wi hem leveren ende quiten zullen hem ende allen den ghenen die met hem comen zullen in onser helpe so wanneer dat si buten den palen der gravescip van Ghelren dicke ghenoemd ons te helpe comen, tote der tijd toe dat si weder ^m binnen den palen keeren van der gravescip van Ghelre voirghenoemd, sonder alrehande archlist; ende des ghelike wi Reynoud van Ghelre hier voren ghenoemd so wanneer wi onse lieven neve den grave van Heynnegouwen ende van Holland voirs. vermanen zullen in onse helpe te comen met sinen luden ende met sinen vrienden alse voirs. es, so zullen wi hem leveren ende quiten ende allen den ghenen die met hem comen zullen in onser helpen so wanneer dat si buten den palen van den gravescepen van Heynnegouwen, van Holland ende dat dair toe behoirt comen zullen om ons te helpen, tot der tijd toe dat si weder ⁿ in den palen keren van den gravescipen van Heynnegouwen ende van Holland voirseyd, sonder archlist. Voirt zo en zullen wi Willaem etc. niemant^o ghestaden in onsen landen dat hi in der gravescip van Ghelre scade doe, alse verre alsmen ons ende onsen luden recht ende besceyt doet na des lands recht ende na slands ghewoente van der gravescip van Ghelre ^p ende datter toe behoirt; nochtan wi Reynoud sone des graven van Ghelren en zullen des ghelike niet weder ghestaden dat iemant uter gravescip van Ghelre scade doe in den gravescipen^q van Heynnegouwen, van Holland, van Zeland^r, van Vriesland ende dat dair toe behoirt, alse verre alsmen ons ende onsen luden recht ende besceyt doet na slands recht ende na slands ghewoente van den lande voirs. Voirt zullen die coepluden van onsen beyder landen^s voirghenoemd elc in des anders lande varen ende keren vredelic^t, ende die zullen wi bescermen ende bescutten ghelike ons zelfs luden, behouden onser beyder recht van onsen tollen, sonder archlist. Oec ware dat zake dat enigherande dinc van tuyste, van kive jof so van wat stucken dat waer tusken ons, onsen landen voirghenoemd ende onsen luden, si verliepen jof ghescieden in enigherande archeyt, dair zullen wi elkerlijc van ons beyden toe senden ende setten twie van onsen rade die sake^u te besiene, tenden ende neder te legghen^v bi horen eede met minnen jof met rechte.

Ende omme dat wi willen dat alle dese voirghenoemde sake ende elc sonderlike^w bi hem die voirghesuoren ende ghesekert hebben in goeden trouwen te houden also als hier boven staet ghescreven vast, zeker ende ghestade bliven ende wel ende ghetrouweliken ghehouden, sonder verbrec ende sonder archlist^x, alse langhe als wi beyde leven, so hebben wi Willaem grave etc. voirghenoemd ende wi Reynoud, sone des sgraven^y van Ghelre voirghenoemd, dese letteren wighehehanghede^z bezeghelt met onsen zeghele. Ende om die mere sekerheyde, op dat alle dese voirs. stucken die vaster bliven ende van ons beden wel ghehouden, so hebben wi Willaem etc. voirghenoemd ghebeden heren Janne van Heynnegouwen, onsen lieven broeder, dat hi te kennessen alder voirwarden^a' voren ghescreven desen brief met hem bezegle wille; ende wi Reynoud voirs. hebben oec ghebeden onsen lieven oem heren Heynric van Vlaendren, grave van Loden, dat hi te kennessen alle der stucken^b' voirsproken desen brief met ons bezeglelen^c' wille. Ende wi Jan van Heynnegouwen ende here van Beymond ende Heynric van Vlaendren, here van Loden, maken cond ende kenlic allen luden dat wi bi beden heren Willaems^d' grave van Heynnegouwen ende van Holland voirs. ende bi bede Reynouds, des graven sone van Ghelren, hebben te kennessen van allen desen stucken voirghenoemd desen brief met hem bezeghelt met onsen zeghelen, want wier over ende ane gheweset hebben ende bi onsen rade is ghesciet. Ghegheven, ghemaect ende ghevorwort te Woudrichem^e' op sinte Martijns^f' avonde in den winter anno Domini M CCC ende XIX°.