Registers van de Hollandse grafelijkheid 1299-1345

Hendrik van Brederode bepaalt dat, mocht hij overlijden zonder wettig nageslacht, al zijn onroerend goed zal toevallen aan zijn echtgenote Isabella van Fontaines, jonkvrouw van Brederode; graaf Willem III bezegelt de oorkonde mee.

Zie ook de volgende oorkonde nr. KE 97 in dit register. Vgl. tevens de deels gelijkluidende oorkonde van gelijke datum onder nr. WI 346.

Wi Henric^b van Brederode allen den ghenen die desen zullen sien jof horen lesen, saluyt met kennesse der waerhede. Wi maken cont ende kennelic allen luden dat wi in ghesonden live, machtich onser redene ende onser vijf zinne, wel beraden, lachens monts ende met vrien wille up draghen ende gheven Ysenbeel van Fonteynes, onser liever ghesellinnen, joncfrouwe van Brederode, om goide jonste ende om trouwe die wi tote hare hebben, tote onser zielen behoif al onse inbodel jof in have, beesten tam ende wilt, clenoet, ghelt, corn ende al onse ander rorende goit, oec hoe dattet ghenoemt es^c, dat wi laten in onser doet, niet uytghenomen, in deser manieren: es dat zake^d dat wi eer sterven eer si sonder wittachtighe gheboerte van hare, dat si al dit vornoemde goit hebben zal vri ende in allen manieren onbeslet nae onser doit in vryen eyghendomme, haer orbaer ende haren vryen wille mede te done onghehindert, ende onser zielen mede te ghedenken, als wi up hare betrouwen.

Ende om dat wi willen dat dese vorseyde ghifte onghehindert ende sonder wedersegghen vaste ende ghestade blive, zoe hebben wi desen brief voren beseghelt met onsen seghele, ende hebben ghebeden enen hoghen prince ende enen moghende, onsen lieven here, heren Willaem^e, grave van Heynegouwen^f, van Holland^g, van Zeland^h ende here van Vrieslandⁱ, dat hi desen brief met ons beseghelen wille. Ende wi Willaem^j grave van Heynegouwen^k, van Holland^l etc., hebben desen brief beseghelt met onsen seghele om bede Heynrix van Brederode. Ghegheven int jaer ons Heren M CCC ende XXV^o up sente Victors dach.