Registers van de Hollandse grafelijkheid 1299-1345

Simon van Benthem, ridder, draagt zijn huis ter Binkhorst en het erbij horende land op aan graaf Willem III, en ontvangt dit terug in leen.

Allen den geenen die desen brief zien sullen off hoeren lesen, ick Symon van Benthem riddere, salut en^a kennesse der waerheyt. Ick make u kont dat ick upgedraegen hebbe enen hoogen eedelen man, mijnen lieven ende gerechten heere, heren Willem grave van Henegouwen^b, van Hollant^c, Zellant^d ende heere van Vrieslant, mijn eygelick goet dat hier nae gescreven staet, als mijn huys ter Binchorst metten lande datter omtrent leyt, des dertich mergen es off vive ende dertich, ende welck lant leyt binnen den palen die hier nae staen, dats tusschen den Vroenensloet opdeen ende an dOude lant up dandre, ende ^e den veen up deene zijde ende de Vroene made up dandre syde; welck huys ende lant voors. my mijn lieve heere vorseyt verliet heeft ende ick van hem ontfangen hebbe te houden in zulcke leene alse hier nae volcht, dats dat dat voors. huys ende lant niet weder an hem versterven en sall noch en mach noch an zijne naecommelingen binnen after suster kint.

In oirconde hier off hebbic mijnen lieven heere den grave voornoemt dese lettere gegeven, bezegelt met mijne zegele utehangende. Gedaen tot Alebrechts berghe des donresdaghes na sente Servaes dach int jaer onsHeeren M CCC ende achte.^f