Registers van de Hollandse grafelijkheid 1299-1345

Graaf Willem III bevestigt Jan van der Wateringe in het bezit in de allodiale goederen die deze erfde van diens vader en echtgenote en in gebruik heeft in Elsgeest en Warmond, behoudens de rechten die de bisschop van Zuden, Willem vrouw Baartenz. en hijzelf daar op hebben.

De onderstaande tekst is gebaseerd op afschrift B.

Wi Willaem^a grave van Henegouwen^b, van Holland^c etc. maken kont allen luden dat wi Janne van der Wateringhe gheset hebben in alden eygheliken goide dat haer Jan van der Wateringhe^d sijn vader in bestarf ende liet ver Marien sinen wive, ende in den goede tote Elsgheest ende te Warmonde dat Dieric van den Wale cofte tyeghens heren Jacob van Lichtenborghe hem ende sinen boden^e vrielike te ghebruken, behouden den bisscop van Zuden ende Willaem^f veren Barten sone alsulke renten alse siere in sculdich sien te nemen met open brieve diere si of hebben, ende behouden anderen brieve diere wi af ghegheven hebben in deser manieren dat ons Jan van der Wateringhe ontheffen ende quiten zal van twintich pond Hollands^g sjaers zonder onse scade yeghens Baertoud^h van Haspendelf, die wi hem van Jans weghen voerseyd beloeft hebben alse van sijns wijfs medeghave; ende heeft yemand op dit goid yet te segghene, dien willen wi dat men doe trechtⁱ van onsen lande ende alle dinc voerscreven, sonder arghenlist.

Ghegheven tote Dordrecht^j op des heylich Cruys dach in septembre^k int jaer ons Heren M CCC ende twintich.