Registers van de Hollandse grafelijkheid 1299-1345

Wouter van Mijnden, knaap, zoon van heer Amelis van Mijnden, ridder, belooft dat hij graaf Willem III, wiens leenman hij is, met raad en daad zal bijstaan tegen iedereen, en dat hij, wanneer hij een huis mocht bouwen, dat aan de graaf zal opdragen als een open huis, en verklaart dat bij verbreking van deze belofte dit huis en al zijn goederen verbeurd zullen zijn; de oorkonde wordt meebezegeld door een aantal met name genoemde mannen, die voor Wouter als borg optreden.

De onderstaande tekst is gebaseerd op afschrift B.

Allen luden etc. doe ic verstaen Wouter van Minden^a knape, heren Amelijs f.^b van Minden ridders^c, in kennesse dier waerheit dat ic mit minen vrien wille ende bi rade miere ghemene vriende mi ende mine nacomelinghe ewelike verbonden hebben ende verbinde met desen jeghenwordighen brieve^d op al mijn^e goit ende miere nacomelinghe met minen lieven gherechten here, enen edelen prinche heren Willame^f grave van Henegouwen^g etc., daer ic mijn goit^h of houde ten rechten lene, ende mit sine nacomelinghe in dereⁱ manieren als hier na bescreven staet: dats te wetene dat ic Wouter voers. ende mine nacomelinghe nemmermeer^j zullen doen noch werken jeghens minen lieven rechten here den grave^k voernoemd noch jeghens sine nacomelinghe, mar^l ic ende mine nacomelinghe zullen hem helpen ende sine nacomelinghe jeghens elken man met rade ende met dade na al onser macht, met live ende met goede; ende vord waer dat zake dat ic jof mine nacomelinghe een huys timmerde^m, dat soude sijn ende bliveⁿ een vri ende een leidich open huys mijns heren^o sgraven voers. ende siere nacomelinghe tote al haren wille te besitten ende te ghebruken jeghens elken man wanneer^p dat sies begheren ende eeschen met brieven jof met boden. Ende waer dat zake dat ic Wouter voers. of enich van minen nacomelinghe enich van desen voerseiden ponten braken jeghens onsen rechten here den grave^q voers. jof jeghens zine nacomelinghe, dat God verbieden moet, ende sijt in hare waerhede proeven mochten, so soude dat huys ende al mijn goed jeghens minen rechten here den grave voers. ende sine nacomelinghe verboerd sijn ende vri ende ledich an hem ende sine nacomelinghe weder comen, sonder enich wedersegghen.

Ende omme dat ic Wouter voerseit wille ende beghere vor mi ende voer mine nacomelinghe alle dese ponten als si hier voer bescreven staen stade ende vaste ewelike te houden ende te bliven, soe hebbe ic desen brief bezeghelt met minen zeghele uythanghende; ende om meer zekerhede so hebbe ic minen lieve here heren Willame^r grave etc. voernoemd te borghe gheset heren Ghizebrecht^s here van Yselsteine^t, heren Arnt^u sinen ousten zone, heren Steven van Zulen, ridders, Zueder van Vianen, Zueder van Zulen, Harman van Zulen, Heynric^v van Loenresloet, Ghizebrecht^w van Ruwele, Gheret^x Splinter van Nuwenrode^y, Jan van Rijswijc, Splinter heren Dierix^z sone ende Ghizebrecht^a' van den Pole, in dustanighen manieren dat deze voernoemde borghe, waer dat zake dat ic jof mine nacomelinghe in enighen pointen die hier voer bescreven staen deden jof wrochten^b' jeghens minen lieven gherechten here den grave voers. jof jeghens sine nacomelinghe, souden sijn jeghens mi ende jeghens mine nacomelinghe ons te letten ende te crenken ane live ende ane goede waer si moghen na al hare macht. Ende om dat ic Wouter voers. mi ende mine nacomelinghe hier in verbonden ende verwilcoerd hebbe met minen vrien wille alser voers. es, so bid ic den voernoemden^c' borghen dat si alle hare zeghele an desen brief hanghen biden minen, tenen orconde aldar^d' stucken die hier voer bescreven staen. Ende wi borghe voernoemd dor bede wille Wouters voernoemd^e' hebben onse zeghele ghehanghen an desen brieve biden sinen tenen orconde, want wiet kennen dat alle dese stucken also sien als hier boven bescreven staet. Ghegheven int jaer van zeventiene des zonnendaghes na sinte Victoers^f' dach.