Registers van de Hollandse grafelijkheid 1299-1345

Graaf Willem III kent een aantal voorrechten toe aan de kooplieden uit Kampen die in plaats van naar het Zwin thans naar Dordrecht of elders in zijn gebied komen, met de bepaling dat na herroeping van dit privilege deze voorrechten nog zes weken van kracht zullen blijven.

Vgl. nrs. UT 3 en 40.

De onderstaande tekst is gebaseerd op afschrift B.

Wi Willaem^a grave^b van Henegouwen^c etc. allen den ghenen die desen ^d brief sien zullen jof horen lezen, saluyt ende kennesse der waerheit. Sint die coepmanne van der stede van Campen die tote nu toter havene diemen hiet Zuin mit hore comenscip plaghen te varen nu toet onser haven van Dordrecht^e jof toet anderen steden daerd hem becoemt binnen onsen lande met horen comenscap van desen daghe voerd begheren te varen ende achtinghe hebben, ende wi ane sien ende merken dat van hare toe coemste al onse land orbaer ende eer hebben mach; es dat si hare vaerd alse voers. es tote onsen lande maken, gheve wi hem zulke vrihede ende gratie alse hier na bescreven es.

In den eersten, es dat dese voerseide coepmanne van Campen scip brekinghe ghedoghen ende hoer goed toet onsen lande coemt, dat goed zullen wi doen houden onder onse machte een jaer ende enen dach gheheel also: es datter yemant levende^f die die scipbrekinghe ghedoghet hevet coemt binnen deser voerseider tijd, of der gheenre erfnamen dier doet sijn met wittachtighen orkonden of mit warachtighen tekenen, ende dat goed eyschen, men zal hem sijn goed wedergheven sonder weder tale; ende es dat zake dat binnen der voerseider tijd niemant dat goed ane sprect, zoe moghen wi dat voerseide goed an ons trecken of die ghene die van ons verlient es, ende dat zal hi doen bi onsen orlove.

Voerd zullen dese coepmanne, bi wat weghe si in onsen lande varen ende voer onse tolne willen varen, gheven van elken last harinx II d. Enghelsche^g van tollen, ende elken hode tarwe of rogghe IIII d. Hollands^h, ende van gherste of evene II d. Hollandsⁱ, van elken hoed erweten of bone I Enghelsche^j pening^k; ende van anderen goede dier^l niet voerscreven en sien, daer of zullen si gheven tolne sulc als si plaghen te gheven inder voerseider havene van den Zuene. Ende es dat zake dat si eens tollen verghouden hebben van horen gode, so en sien si niet meer sculdich daer of tolne te gheven. Ende es dat zake dat si enich goed copen in onsen lande ende dat buten lande voren, so sullen si gheven tolne alse ander coepmanne pleghen te gheven in desen caes; ende es dat zake dat dit goed dat si gheleit hebben in onsen lande willen weder leiden, hier of en zullen si ghine tolne gheven meer dan si ghegheven hebben.

Voerd gheven wi hem, is dat zake dat dese voerseide coepmanne jof hare ghezellen jof hare ghesinne van enen scepe onder hem vochten in een scip sonder manslachte, dat zullen die coepman onder hem doen beteren also dat reden es ende eerlike; ende es dat zake dat luden van tween scepen onderlinghe vochten, dat zal onse rechter doen beteren bi coepmanne die die vorseide zake niet an en gaet. Ende es dat zake dat dese vorseide coepmanne jof hoer knapen buten horen scepe vochten opt land, dat souden si beteren ^m na der witte van den lande. Ende van desen fayte en zal niemant en sijn ghepijnt noch in persone noch in goede, sonder dier ghene die sculdich werden daer of.

Hier boven hebben wi dese voerseiden coepmannenⁿ ontfaen ende hoer goed te coemene^o, te merren, weder te keren after al onse land op onse vaste ende zeker gheleide; ende waer dat zake dat hem yemant onrechte dede in haren persone jof in horen gode, wi sullen hem dat onrecht dat hem ghedaen es redelike doen beteren. Ende waer dat zake dat enich twist roerde twuschen ons ende onsen lande an die ene zide ende tuschen den bisscop van Utrecht^p haren here ende sijn land an die ander zide, dat die coepmanne moghen comen in onsen lande met hore comanscippe op onse gheleide voers.

Ende waer dat zake dat yemant hoer goed cofte, die coepman zal hem ghenoech doen binnen den zelven daghe jof hi zal hem zekerhede doen binnen den zelven daghe, also als si over ene draghen ende den ghenen ghenoghet die dat goed vercofte; ende es dat zake dats die coper niet en doet, so mach die vercoper na dien daghe voerseit met^q sinen gode dat vercoft was sinen wille doen.

Ende so wat goede dat si toet horen eighen orbaren, dat es te verstaene van spisen, van clederen, van anderen horen orbaer die zi behoeven, int scip copen, daer of en zullen si ons en ghine tolne gheven.

Vord so willen wi dat alle wichtelike goed bi der waghe worde gheweghen^r.

Ende alle dese voerseide zaken ende elkerlike bi hem so hebben wi desen voerseiden coepmanne ghegheven, behouden ons ende hem vrie machte daer toe te doene, te wandelen, te corrigiren also als ons beiden orbaer dinket^s; ende ghebieden^t allen onse tolnaren dat si van desen voerseide coepmanne van Campen ghiene meer tollen ^u eyschen noch nemen dan hier voerscreven es.

Ende al dese voerseide vrihede hebben wi desen voerseiden coepmanne ghegheven in alre manieren alse voerscreven es, durende zes weken na onsen weder roepen.

In orkonde desen brieve etc. Ghegheven int jaer ons Heren M° CCC ende viere in sinte Katelinen daghe.