Registers van de Hollandse grafelijkheid 1299-1345

Jan III (van Diest), bisschop van Utrecht, verklaart van graaf Willem III 3.700 pond zwarten Tournois te hebben geleend, waarvoor hij hem als onderpand het kasteel Vreeland ter beschikking stelt, met de bepaling dat hij de door de graaf aan te stellen kastelein 200 pond Tournois per jaar zal betalen voor het beheer, alsmede de kosten van onderhoud en eventuele renovatie, dat de kastelein de schoutambachten Vredeland, Nichtevecht, Breukelen en Maarssen zal besturen en hem daarvan rekening zal doen, en dat bij afbetaling van de schuld en de bijkomende kosten het kasteel weer aan hem zal komen; deze regeling valt onder de overeenkomst met zijn clerus betreffende de verpanding van het Sticht voor 8.000 pond.

Vgl. het volgende nr. UT 99, alsmede nr. UT 101.

Wi Jan bider ghenaden Gods bisscop tUtrecht maken cond allen luden dat wi sculdich zien van ghelienden ghelde enen edelen prinche ende enen moghende, onsen lieven neve heren Willame^c grave van Heynnegouwen^d etc., zeven ende dertich hondert pond zuarter Tornoyse^e, enen ouden groten koninx Tornoyse^f over sestien penninghe gherekent, die wilke zeven ende dertich hondert pond wi ghekeert hebben in onser kercken oerbaer ende Ghestichts van Utrecht voirs.; voir^g welke zeven ^h ende dertich hondert pond Tornoyse voirs. wi gheset hebben ende setten met desen jeghenwoerdighen brieve onsen lieven neve den grave van Hollandⁱ voirs. tenen onder pande onse huys tote Vredeland, in dusdanigher manieren dat wi gheven sullen van desen voirseyden huyse te verwaren ende te houden den ghenen diere onse neve die grave voirs. up set twee hondert pond Tornoyse sjaers. Voird sijent^j voerwaerden: waer dat zake dats onse huys voirs. te doene hadde datmer ane timmerde jof yet nuwes makede, dat zoutmen doen bi heren Steven van Zulen^k, ridder, ende bi Wouter Ghereyt^l van onsen weghen; ende ghebrake here enich, wi souden enen anderen jof die na ons comen sal immer^m in die stede setten, ende bi twien mannen diere die grave voirs. toe setten zal; ende dien cost zalmen ons rekenen, ende dien sullen wi ghelden. Ende zoe wien die grave voirs. up den huyse settet, die sal verwaren onse vrie scoutambochten die ten huyse behoere: dat Vredeland, Nichtevechtⁿ, ende Brokelede ende Marchen^o, alze van den daghelixen gherechte; ende dair sal hi ons goede rekeninghe of doen. Ende dit voirseyde huys zal die grave voirs. ende sine erfname besitten ende vrielike ghebruken ende hore boiden van haren weghen van ons ende van onsen nacomelinghen biscopen tUtrecht, ter tijd toe dat wi hem dese zeven ende dertich hondert pond Tornoyse ende die twie hondert pond Tornoyse sjaers van den huyze te houden ende die cost van der timmeringhe dat mer ane timmeren zal ter goeder rekeninghe voldaen hebben, sonder arghenlist, in allen manieren alse voirscreven es. Ende zoe waneer wi jofte onse nacomelingher biscopen tUtrecht^p, jofte onse clesie van Utrecht^q alzer gheen biscop en ware, betaelt hebben den grave voirs. jof sine erfnamen diese zeven ende dertich hondert pond Tornoyse metten coste van den huyse te houden ende met dien coste van der timmeringhen, in allen manieren alst voirscreven es, soe sal die grave voirs. jof sine erfname onse huys rumen ende ons des vrieliken laten ghebruken, sonder arghenlist. Ende want wi alle dese vorscreven poynten ghedaen hebben omme noet ende orbaer ons Ghestichts^r van Utrecht^s vors., zoe verbinden wi ende obligieren desen brief mede up den brief van den achte dusent ponden die ons ^t onse clesie bezeghelt hevet onse Ghesticht van Utrecht^u mede te versetten.

In orkonde desen brieve bezeghelt open^v met onsen zeghele. Ghegheven tote Utrecht int jaer ons Heren M^o C^oC^oC^o zeven ende twintich des woensdaghe na sente Remigius daghe.