Registers van de Hollandse grafelijkheid 1299-1345

Graaf Willem III beleent Otto van IJsselstein ten overstaan van een aantal met name genoemde leenmannen met de in extenso opgesomde goederen die deze hem had opgedragen, en bepaalt het heergewaad van dit recht erfleen.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

Wi Willaem^a grave etc. maken cond etc. dat Otte van IJsselsteyne^b mit sinen vrien wille ons ghegheven hevet den eyghendoem van al dien land dat hier na bescreven staet, ende onsen boden tonser behoef dat op ghedraghen, in allen gherechten dair dat land gheleghen es alse dair slants recht es, ende egghen ende enden dair of bewijst. In den ersten vijftalf morghen lands die gheleghen sien in Wijc in heren Zueders gherechte van Abbcoude^c, die Willaem van Riebek^d nu bruket. Voirt van vijf viertelen lands die gheleghen sien op Marsen^e vene, die Snellaert ende Gherard^f Culenburch nu bruken. Item van achte viertelen lands die aldair gheleghen sijn, die Willaem^g Aven sone nu bruket. Item van ses morghen lands ^h die gheleghen sien in heren Zueders gherechte van Vyanen, die Nyclays Cortⁱ nu bruket. Item van ses morghen lands die gheleghen sien in Albrechts Handermarcs gherechte, die die selve Albrecht nu bruct. Item van vijf morghen ende twe hont lands gheleghen in Willaems^j gherechte van Vloten^k, die Scade van Welle nu bruct^l. Item van tien morghen lands gheleghen op Wielrevelt^m, die Hubrechtⁿ van der Weteringhe^o nu bruket. Item van vier morghen ende I hont lands die Biernd Johans sone uten Enghe nu bruct^p. Item van vijf morghen ende een hond lands die Willaem^q van Vloeten^r nu bruct^s. Item van drien morghen lands gheleghen op Heynstmade, die Langhe Jacob nu bruct. Item van enre hoeven lands gheleghen in Dierix gherechte van Jutfays^t, die Floris van Jutfais^u nu bruct. Item ses morghen lands gheleghen in Heyencoep in Willaems^v gherechte van der Maerne^w, die Ghisebrecht^x Pauwe nu bruct. Item van neghen morghen lands gheleghen te Marsen^y int^z biscops gherechte van Utrecht^a', die Ysebrant veren Wennekine sone nu bruket. Item^b' van enre viertel lands gheleghen opt veen int Domproist gherechte, die Aelbrecht^c' Willaems^d' sone nu bruct, ende van ere viertel lands gheleghen in den selven gherechte, die Aelbaren Hughen sone nu bruct. Wilc voirnoemd land, egghen ende enden alst gheleghen es, wi den voirs. Otten van IJsselsteyne^e' weder gheven ende verliet hebben te houdene van ons ende van onsen nacomelinghen graven van Holland^f' toit enen rechten onversterfliken erflene, te verherewairden mit twintich groten coninx Tornoyse^g' jof mit der wairde van dien ghelde. Hier over waren onse trouwe manne hair Gherard^h' here van Voirne, borchgrave van Zeeland^i', hair Ghisebrecht^j' here van Yselsteyne^k', hair Zueder van Abcoude^l', hair Daniel^m' van der Merewede^n', hair Willaem^o' van Duvoirde^p', hair Dieric^q' Bokel, ridderen, Arnoud^r' van den Dorp, Inghebrecht^s' van Voirscoten, Jan van der Boechorst ende Wouter Gherard^t', knapen.

In orkonde etc. Ghegheven Tordrecht^u' des woensdaghes in die Pascyweke int jaer ons Heren M CCC ende dortich.