Registers van de Hollandse grafelijkheid 1299-1345

Burgemeesters, schepenen en gemene Raad van Utrecht beloven dat zij en hun burgers zich zullen houden aan de uitspraak die graaf Willem III mondeling of schriftelijk zal doen in de strijd tussen Hendrik van der Lek enerzijds en de stad Utrecht en Jan van Rijzenburg anderzijds, op straffe van een boete van 2.000 pond zwarten Tournois, wanneer althans de graaf die uitspraak zal doen voor 1 mei eerstkomend.

Vgl. nr. UT 140, de grafelijke uitspraak in deze kwestie.

Wi borghemesters, scepene ende ghemene Rait van der stat van Utrecht^a doen verstaen allen luden dat wi van onser stat weghen ende onse borghere^b van Utrecht ghelovet hebben ende gheloven mit desen brieve enen moghende hoghen man, onsen lieven here heren Willaem^c grave van Heynnegouwen^d etc., dat wi ende onse borghere voirseyd horen houden ende witteliken voldoen sellen alsulc segghen ende soene als die grave voirs. segghen sal mit sijns selves monde jof mit sinen openen brieve tuischen dien dach van^e huden ende dien ersten dach van meye die naist comende es, et sie recht of minne, bi sijns selves goddenken, van alle twiste, claghe, scade ende orloghe dat sijn ende ghewesen hebben toit dien daghe van huden, oec waen si roeren, tuischen Heynrike van der Lecke an die ene side mit dien sinen ende ons ende onse borghere^f ende onse stat van Utrecht mit Jehan^g van Risenburch^h, sine ende onse hulpere an die ander side; wartⁱ dat wi dat niet en daden als wi belovet hebben ende hier voirscreven es, so waren wi sculdich onsen here den grave voirs., ende loven oec mit desen brieve te betailen, enen pene van tueen dusent ponden zuarter^j Tornoyse^k, enen goeden groten coninx Tornoyse^l voir sestien penninghe gherekent, die wi hem betailen soude also hi of sijn boden ons dier vermaenden, sonder enich weder segghen; ende sonder alle archlist. Ende wair dat sake dat onse here die grave voirs. sijn segghen niet en seghede binnen deser tijd die voirscreven es, so waren wi claerliken quite ende vri van deser voirs. pene.

In orkonde etc. Ghegheven des dinxendaghes na Palmen dach int jaer ons Heren M CCC een ende dortich.