Registers van de Hollandse grafelijkheid 1299-1345

Gijsbrecht heer van IJsselstein, zijn zoon Arnoud, ridders, zijn dochter jonkvrouw Agnes, jonkvrouw van Montfoort, en haar zoon Jan van Montfoort beloven dat het huis te Montfoort voor graaf Willem III een open huis zal zijn zolang een van de drie eerstgenoemden de voogdij over Jan van Montfoort, die hun door de graaf is opgedragen, zal uitoefenen; de oorkonde wordt meebezegeld door heer Jan van Henegouwen, heer van Beaumont, en heer Gerard heer van Voorne, burggraaf van Zeeland, die tevens borg staan voor deze toezegging.

Vgl. ook het voorafgaande nr. UT 172.

Wi Ghisebrecht here van Yselsteyne ende Arnd syn^b sone, ridderen, joncvrouwe Agniese, joncvrouwe van Montvoirde^c, ende Jan van Montvoirde, hor sone, maken cond allen luden^d dat wi alle viere voirscreven ende elc besonder vor ons ende voir onse nacomelinghe onsen lieven here, heren Willaem^e grave^f van Heynnegouwen^g, van Holland^h ende here van Vriesland, hem ende sinen nacomelinghen beloven bi onsen eede, onser trouwen ende bi onser zekerhede mid desen brieve dat wi onsen here den ..grave voirs. of sinen ghewairden bode leveren zullen tot allen tyden ende alse dicke als hi wille ende hijs te doene hevet dat huus te Montvoirde sijn open huys te wesen, tot ziere behoef ende tot ziere vriende, binnen diere tijd dat onser enich van ons drien voirscreven die monbairscip van Janne van Montvoirde voirs. in handen hebben sal, also alse ons onse here die graveⁱ voirs. mid sinen brieve ^j bevolen heeft.

Ende omme dat wi alle voirwairde voirscreven sonder archlist vast ende ghestade houden willen, soe hebben wi ghebeden edelen luden ende moghende heren Janne van Heynnegouwen^k, here van van Byaumond, ende heren Gherard here van Voirne, burchgrave van Zeelland^l, dat si dese voirwairde voirscreven mid ons ende^m zeghelen willen. Ende wi Jan van Heynnegouwenⁿ, here van^o Byaumond, ende Gherard^p here van Voirne, burchgrave van Zeelland^q,^r omme bede willen heren Ghisebrechts^s here van Yselsteyne^t, heren Arnds sijns soens, joncvrou Agniesen joncvrouwe van Montvoirde ende Jans hoirs soens voirscreven, ende omme die meerre zekerhede wair dat zake dat si viere jof hore enich van hem vieren voirscreven hier in yet versumede jof ghebrokich ware, zoe gheloven wi alle vorwairden voirscrevenen vor hem te voldoene, ende hebben desen brief bezeghelt mid onsen zeghelen. Ghegheven op sinte Odulfs dach int jair ons Heren M° CCC° ses ende dortich.