Registers van de Hollandse grafelijkheid 1299-1345

Graaf Willem III verkoopt aan heer Zweder van Vianen en Hubrecht de Schenk de heerlijkheden van Het Goy en Hagestein met alle toebehoren, uitgezonderd het huis ten Goye en het gerecht te Houten en Het Goy, welke goederen Zweder en Hubrecht in recht erfleen van hem zullen houden, dit met de bepaling dat wanneer de kopers of hun nakomelingen deze goederen zouden willen splitsen hij ieder een eigen oorkonde zal geven.

Vgl. het volgende nr. UT 176.

Wi Willaem^b ..grave van Heynnegouwen^c, van Holland^d van Zeelland^e ende here van Vriesland maken cond allen den^f ghenen^g die dese lettere sullen sien jof horen lesen dat wi vercoft hebben voir ons ende voir onse nacomelinghe heren Zueder van Vyanen ende Hubrecht^h den Scencke alle die heerlichede van den Goye ende van ⁱ Haghensteyne, dat es te verstane Gaspaerde^j, Everdinghen^k, Gobertinghe, Tulle ende tUael, Honswijc ende Jaersvelt, met alle den wairden, mit vischerie, mit lande, mit vere, mit tienden ende mit renten, in hoghen gherechte ende in laghen, also alse die heerscap gheleghen es ende si joncvrou Margriete^l uten Goye van ons helt ende die ons van hair ane ghecomen es, met alle der manscap ende mit heerlichede die joncvrou Margriete^m voirscreven, dair God die ziele of hebben moet, van ons helt, uytghenomen dat huus ten Goye ende dat gherechte te Houten ende ten Goye, also alst Ghisebrechtⁿ uten Goye plach te houden, daert huus voirscreven in staet, welc huus ende gherechte Ghisebrecht^o voirnoemd van ons houd, ende dair wi selve die manscap an ons of behouden ^p willen; ende alle dese heerscippe ende goede voirscreven sullen here Zueder van Vyanen ende Hubrecht die Scencke ende hoir nacomelinghe van ons ende van onsen nacomelinghen houden ten rechten erfliene, ende met deser voirscreven heerscippe sullen si ende hore nacomelinghe ons ende onsen nacomelinghen dienen ghelike anders onsen welgheboeren^q mannen in Holland^r. Ende alle dese heerscippe ende goede voirscreven gheloven wi vor ons ende voir onse nacomelinghe heren Zueder^s ende Hubrecht voirscreven ende horen nacomelinghen te waren ende in te houden, ende alle calengen van desen coep of te doene^t. Ende wair dat zake dat here Zueder ende Hubrecht voirscreven jof hore nacomelinghe dese heerscippie ende goede deelen wilden ende van mallic anderen sceyden, soe souden wi desen brief weder nemen ende elkerlijc gheven enen brief onder onsen zeghel op sulke delinghe als si doen souden.

In orconde desen brieve bezeghelt mit onsen zeghele. Ghegheven int jair ons Heren M° CCC° drie ende dortich des dinxendaghes na Paesdach.