Registers van de Hollandse grafelijkheid 1299-1345

Graaf Willem IV geeft ten behoeve van vrouw Machteld vrouwe van Bergen op Zoom en van jonkvrouw Johanna dochter van heer Albrecht van Voorne vidimus van een oorkonde d.d. 1313 juli 21 waarin heer Gerard van Voorne en diens echtgenote Heilewijf beloven aan Arnoud graaf van Loon, Gerard van Wezemaal, heer van Merksem, en aan Johanna van Loon, vrouwe van Quabeek, dat hun oudste wettige zoon bij het bereiken van diens meerderjarigheid in het huwelijk zal treden met jonkvrouw Machteld jonkvrouwe van Bergen op Zoom.

Wi Willaem^b ..grave van Heynnegouwen^c etc. maken cond allen luden dat wi ghesien hebben enen brief gheheel ende onghequests, ombevlect, sonder rasure ende wel bezeghelt, sprekende van woirde als hier na bescreven staet.

Wi Gherard here van Voirne, burchgrave van Zeelland^d, ende Heylewijf vrouwe van Vorne, burchgravinne van Zeelland, maken cond allen luden dat wi met enen hoghen man ende met enen edelen, heren Arnoude ..grave van Loen, heren Gherarde^e van Wezemale, here van Marchem, ende met Johanna van Loen, vrouwe van Quaecbeke, over een ghedraghen sien met huwelike alse van ere edelre joncvrouwen Machtilde, siere nichten ende hare oudster dochter, joncvrouwe van Berghen up den Zoem, ende van onsen oudsten erfsoene van wittigher boirte, ende dien te goeden in manieren ende in vormen als letteren spreken die wi Gherard here van Voirne voirs. dair of ghegheven hebben ende bezeghelt mit onsen zeghele uythanghende. Mit wilken huwelike ende gedinghe wi Gherard^f here van Voirne ende Heylewijf vrouwe van Voirne gheloeft hebben ende gheloven te volvaren ende onsen oudsten sone voirnoemt te doen volvaren sonder alle archlist als hi te sinen daghen ghecomen es; ende deden wi noch onse oudste sone des niet, soe souden wi gheven dien voirnoemden heren Arnoude ..grave van Loen, heren Gherarde^g van Wesemale, here van Marchem, ende vrouwe Jehannen vijf dusent pond suarter Tornoyse^h, eens coninx grote vor XVI d. Voir wilke vijfⁱ dusent ponden voirnoemt wi ghebeden hebben enen edelen prinche ende enen hoghen heren Willaem^j ..grave van Heynnegouwen, van Holland^k, van Zeelland ende here van Vriesland, onsen lieven here, ende mijn here Jan van Heynnegouwen, here van Byaumond, sinen broeder, ende mijn here Jan here van Arkel, onsen lieven neve, dat si onse ende onses oudstes sones voirnoemt borghe worden willen vor die voirscreven vijf dusent pond, ende in orconde deser lettere, die wi bezeghelt hebben, bezeghelen met haren zeghelen. Ende wi Willaem^l ..grave van Heynnegouwen^m etc., Jan van Heynnegouwen, here van Byaumond, Jan here van Arkele, omme die bede ende omme die lieve onses lieves neven heren Gherardsⁿ here van Voirne, burchgrave van Zeelland, ende omme die bede veren Heylewijfs sijns wives, vrouwe van Voirne, burchgravinne van Zeelland, sien hare ende hair oudsten soens borghe worden, ende gheloven heren Arnoude grave van Loen, heren Gherarde^o van Wesemale, here van Marxhem, ende vrouwe Jehannen van Loen, vrouwe van Quaeckebeke, te voldoen van dien voirnoemder vijf dusent ponden suarter Tornoyse^p, wair dat here Gherard^q here van Vorne ende verHeylewijf sijn wijf ende hair oudste sone voirghenoemd niet en volvoren mit dien huwelike ende mitter gedinghe als hair oudste soen voirs. sonder archlist tot sinen daghen comen ware; ende hebben dese lettere in orconde ende in kennisse bezeghelt met onsen zeghelen uythanghende in den jare ons Heren XVII^C ende dortiene op sinte Marien Magdalenen avonde.

Ende omme dat wi desen bezeghelden brief voirscreven hebben doen legghen onder den abt van Middelburch^r tot onser nichten behoef veren Machtelden, vrouwe van Berghen up den Zoem, ende joncvrou Jehanen behoef heren Alebrechts dochter van Voirne, ende der hore hem mede te behelpen soe wilke tijt dat sijs te doene moghen hebben, soe hebben wi veren Machtilden voirnoemt dat uytscrift ghegheven open bezeghelt met onsen zeghele. Ghegheven tote Zierixzee des vridaghes up sinte Lucas avonde int jair ons Heren M° CCC° zeven ende dortich.