Registers van de Hollandse grafelijkheid 1299-1345

Graaf Willem IV verkoopt ten overstaan van enkele met name genoemde lieden 400 gemet ambacht in de Oude polder van Hinkele aan heer Raas van Kruiningen en Jan zoon van Jan Dirksz. van den Waarde, die dit goed in recht leen zullen houden, alsmede 100 gemet land aldaar in recht eigendom aan heer Raas en aan Barton en Daniel, zoons van Jan Dirksz. van den Waarde, alles voor een som van 60 pond groten Tournois, evenwel met de bepaling dat wanneer hij vóór Kerstmis 1341 deze goederen voor een hogere prijs kan verkopen, hij dat mag doen, met restitutie van het door genoemde kopers reeds betaalde bedrag.

Vgl. nr. WI 85.

Willaem ..grave van Heynnegouwen^a etc. maken cond allen luden dat wi vercoft hebben heren Raesen van Cruninghen ende Jan Dirx soens sone van den Wairde IIII^C ghemete ambochts, ligghende^b in den Ouden polre van Hinkelin in Zuutbeveland; ende wat die Oude^c polre voirs. minder es dan IIII^C ghemete, dair of sullen si hare volle^d nemen in den Middel polre dairan van der noirtziden in van den middelkijke^e. Ende van desen ambtochte sal hair Raes van Cruninghen hebben die twie deel ende Jan Jans sone dat dordendeel, ende dit sullen si van ons houden in rechten leene. Vort hebben wi vercoft ende verghicht in rechten eyghendome heren Rasen van Cruninghen, Bertoen ende Daniel, Jan Dirx soens kindere van den Wairde, C ghemete lands over vrye arve, ligghende in den Ouden polre van Hinkelijn voirscreven west wairt of van den lande dat wi heren Heynric^f Poppen sone van Zierixe in den selven polre vercoft hebben; ende van desen C ghemete lands sal hebben hair Rase van Cruninghen XXV ghemete ende Daniel ende Bertoen, Jan Dirx soens kindere voirnoemd^g, LXXV ghemete. Ende al dit voirs. ambocht ende land hebben wi hem vercoft omme LX lb. groter Tornoyse^h, den scilt over XVIII d. grote gherekent, dair si ons of betaelt hebben bi tsher Jans hand van Leyden, diere of rekenen sal, XL lb. groete; ende die ander XX lb. groete sullen si ons betalen te Halfvasten naist coemendeⁱ. Ende dit voirs. ambocht ende land gheloven wi den voirs. luden recht warent te wesen tallen rechte. Ende ware dat zake dat wi dit selve ambocht ende land van Kersdaghe^j naist comende over yen jair diere vercopen mochten dan LX lb. groete, soe moghen wi den luden voirscreven ghelt wedergheven ende des voirs. ambochts ende land vrylike bruken onsen wille mede te doene. Ende over dese voirwairde ward onse^k ghetrouwe lude hair Florens^l van Haemstede^m, her Clays Kervinc, Boudijn Willaemsⁿ sone bailiu van Middelburch^o, Heynric^p Paelvet^q, Gheerlof Justaets sone, Hughe van Bigghen kerke ende Willaem^r van der Boede.

In orconde etc. Ghegheven in Middelburch^s op sinte Domaes dach voir Kersavond int jair viertich.