Registers van de Hollandse grafelijkheid 1299-1345

Reinoud II hertog van Gelre en graaf van Zutphen belooft graaf Willem IV dat hij geen aanspraken zal maken op rechten of goederen toebehorend aan het Sticht Utrecht tussen de IJssel en het graafschap Holland, en dat hij ook de graaf niet zal hinderen in diens rechten en goederen in het bisdom Utrecht.

Vgl. het volgende nr. WI 410.

Wi Reynoud bi der ghenaden Goeds hertoghe van Ghelre ende grave van Zuutphen maken cond allen luden dat wi gheloeft hebben ende gheloven mit desen brieve bi onser trouwen ende bi onser zekerheyt enen hoghen edelen manne, onsen lieven neve heren Willem ..grave van Heynnegouwen^b etc., dat wi ons nummermere also langhe als wi leven onderwinden en zullen enichs berechts^c, gheestelic of wairlic, dat den Ghestichte van Utrecht^d toe behoerd als van des Ghestichts heerlichede ende ghoede up dese side der Ysele, tuschen der Ysele ende der graefscip van Holland^e, ende zullen dair mede onsen neve den grave van Holland^f bewerden laten, behouden ons onser heerlichede ende erfnisse die ons van onsen ouders ane ghecomen es, als dat si^g dair inne nyemand van des graven weghen voirs. enich berechts, ghestelic of wereltlic, onderwinden en zal, mer dat wi dair mede bewinden^h moghen. Vord hebben wi ghesekert ende gheloeft, zekeren ende gheloven onsen neve voirs. dat wi nimmermeer omme enigherande ghebot, ghestelic of wairlic, of anders enighe zake die vallen mach hem hinderen noch letten en zullen, noch laten hinderen van yemande die onder ons gheseten es of dies wi machtich zijn moghen, an alsulke heerlichede ende ghoede als onse neve voirs. onder hevet van den bisdom van Utrechtⁱ; zonder alle archlijst. Hier over waren onse ghemene vriende here Diederic here van Monyoye, van Valkenburch, van Voirne ende burchgrave van Zelant, her Willem^j here van Hoirne ende van Altena, here Jan here van Erkel, her Jacop van Mierlair ende her Heynric^k die Coc, ridderen.

In orconde ende stedicheyt hier up hebben wi onsen zeghel an desen brief doen hanghen. Ghegheven tAntwerpen^l int jair na der gheboirte ons Heren M^o CCC^o een ende viertich up sente Benedictus^m dach in maerte.