Registers van de Hollandse grafelijkheid 1299-1345

Graaf Willem III beleent Elizabeth en Machteld, zusters van Zweder van Montfoort, met een aantal goederen te Linschoten, Montfoort en elders, en regelt de vererving van dat leen.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

Wi Willaem^a ..grave etc. maken cond allen luden dat wi onse vijf morghen lands ligghende te Lintscoten in der heren gherechte van Oudemonster, ende onse vierdalf morghen lands ligghende te Mastwijc in der heren gherechte voirs., ende onse vier morghen lands ligghende op den Oerde^b in Symon Enghebrechts gherechte, ende onse achtendalf morghen lands ende vijf morghen lands ligghende in Heeswijc in Roevers gherichte van Montfoirde, ende onse halve hoeve lands van achtendalf morghen ligghende in Blocland in den selven gherechte, ende onse halve hoeve lands van zevendalf morghen ligghende toit Opburen in des heren gherichte van Yselsteyne, ende onse halve hoeve van achtendalf morghen ligghende in Cockanghen in Roevers gherichte van Montfoirde, verliet ende verlient hebben die ene helfte joncvrou Lizebetten ende die ander helfte joncvrou Machtelde, Sueders zusteren van Montfoirde, van ons ende van onsen nacomelinghen te liene te houden in manieren: soe wilc tijd dat die ene van hem twien sterft, dat hoir deel dat si laet van den goede voirs. comen sal op die ander diere te live blivet, ende na hore beyder doyt te comen op Henric den Roever, Roelof des Roevers sone, diere onse man of wesen sal, ende voert binnen achterzusterkint niet te versterven est wijf of man die wittelike ghecomen es van Roelof den Roever voirs.

In orconde etc. Ghegheven des sonnendaghes na Dortienden dach int jair ons Heren M^o CCC^o ses ende twintich.