Registers van de Hollandse grafelijkheid 1299-1345

Graaf Willem III verplaatst de twee kapelanijen, gesticht vanwege de zoen naar aanleiding van de dood van bisschop Willem II van Utrecht, van de Dom te Utrecht naar het Sint Catharinaklooster aldaar, en bepaalt dat deze na de dood van de huidige houder, zijn kapelaan heer Sander, bediend zullen worden door een broeder van de Johannieterorde.

Zie ook oorkonden nrs. WO 54 en 76 in dit register, alsmede nrs. ZE 230 en UT 97.

Wi Willaem^a ..grave etc. maken cond allen luden dat wi van dien twien capelrien die bi onser liever vrouwen ende moeder tiden gheordineert waren te maken in der zoene van bisscops Willaems^b doyt van Machlen, die bisscop was van Utrecht, dair God die ziele of hebben moet, elke capelrie van vive ende twintich pond suarter Tornois^c tsyaers, den groten coninx Tornois^d over sestien penninghe gherekent, ende ghezet hadde te verdienen die ene in den Doem tUtrecht op dien outaer dair die voirs. bisscop Willaem^e voir ghegraven leghet, bi enen goeden capellaen diere daghelix misse op dede, in manieren dat wi ende onse nacomelinghe graven van Holland^f altoes die ghifte van dier capelrien behouden souden. Ende want ons dat capittel van den Doem voirs. diere ghifte niet ghedogen en willen te behouden, soude men die capelrie dair verdienen, soe hebben wi bi concente ende bi wille heren Florens Bartout, here van Machelen, dese voirseyde capelrie ghezet ende zettense met desen brieve in sinte Katrinen^g goodshuys tUtrecht eweliken te verdienen met alsulken renten als wi dair toe ghezet hebben, dat sien vive ende twintich pond suarter Tornois^h tsyaers, den groten over sestien penninghe gherekent, die wi bewijst hebben jairlix voren op te boeren van onsen lande te Wourden dat men tHof land ⁱ, die ene helfte tot sinte Martijns misse in den winter^j ende die ander helfte toit sinte Pieters misse in den lenten^k, ter tijd toe dat wi of onse nacomelinghe dese voirseyde renten ter capelrien voirscreven in anderen zekeren renten bewijst hebben in dusdanighen manieren dat wi ende onse nacomelinghe graven van Holland^l die ghifte van der voirseyder capelrien altoes ghebruken ende gheven sullen. Mar na heren Sanders doyt ons capellaens, dien wise nu ghegheven hebben, die een wairlic persoen es, sone sel wise niemant gheven dan enen broeder van sinte Jans oirde des heyleghen lands van Over mere, ende die sal die renten voirscreven vryliken ghebruken ende die voirseyde capelrie verdienen als voirscreven es; ende na des broders doyt so sel wise jof onse nacomelinghe graven van Holland^m enen anderen broder gheven van der selver oirde, ende also voert ewelike te gheven als si verscint van den ghenen dien wise ghegheven hebben. Ende alle stucken voirscreven sullen wesen ende bliven sonder archlist.

In orconde etc. Ghegheven in die Haghe op sinte Marien Magdalenen dach int jair ons Heren M^o CCC^o zeven ende twintich.