Registers van de Hollandse grafelijkheid 1299-1345

Graaf Willem III bevestigt de keur van de burgers van Domburg, waarbij hij enige punten daaruit verklaart en verbetert.

Cf. de keur voor Domburg uit 1223, het in het register voorafgaande nr. ZE 28.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

De onderstaande tekst is gebaseerd op afschrift B.

Wi Willem^a grave van Heneghowen^b, van Holland^c, van Zeeland^d ende here van Vriesland^e maken cond allen luden. Want wi altoes onsen vorders graven van Holland recht ende custume die si uyt ghegheven hebben vast ende ghestade houden willen ende die altoes te verbeterne; hier bi eist dat wi omme jonste die wi an onse lieve porters van Dumburch^f hebben hare chore vast willen hebben ghehouden in allen pointe also als hare handvesten houden die si van onsen vorders hebben, uyt ghenomen some pointen die wi daer of uut nemen ende in desen brief verclaersen willen ende verbetren.

Int eerste, van den pointe van den vrede te brekene: so willen wi dat so wie so enen vrede selve metter hand ghevet ende selve dien^g vrede breket, dat hi jeghen ons verbord lijf ende goed also verre als hi met scepenen verwonnen word. Ende ware dat zake dat enich van sinen neven den vrede brake sonder wonde, die sal verboren jeghens ons die hand ende jeghens die porte II lb. Turnois^h; ende gave hi iemene enighe wonde binnen vrede, so soude hi verboren sijn lijf ende sijn goet. Ende alse wi of onseⁱ nacomelinghe ene molen hebben te Domburch, sone sal gheen portre tote iemens mole malen dan ter onser, up die boete van XX s. ende dat mele verloren alse groet als sijs malen; ende daer bi willen wi dat onse rentmeester hem een mouder vat sette uptie mole als scepenen van Dumburch^j redelic dinct na dien dat men elwaer nemet. Ende waer een portre van Dumburch^k es in onsen lande daer men eens vreden of begheerd, die es den vrede sculdich te ghevene ende te houdene ghelijc enen andren man die gheen portre in Dumburch^l en es; ende elc man van buten mach sinen maech van binnen die portre es bevreden. Ende ware dat sake dat hem enich portre van Dumburch^m verwillecorde teⁿ enen andren rechte, so salmen hem met dien rechte vervolghen daer hi hem voren verbonden hevet jof verwillecord.

Ende omme dat wi willen dat dese pointe vast ende ghestade houden, so hebben wi desen brief dore hare handveste ghesteken bezeghelt met onsen zeghele. Ghegheven in Middelburch^o des dinxendaghes na^p Grote vastenavende int jaer ons Heren M^o CCC^o ende tiene.