Registers van de Hollandse grafelijkheid 1299-1345

Graaf Willem III beleent Jan heer Nicolaasz., die in zijn dienst grote schade had geleden, met 25 pond Tournois per jaar, op te brengen uit al zijn haaimannen op Walcheren, uitgezonderd die van Jan Jansz. van Souburg.

De onderstaande tekst is gebaseerd op afschrift B.

Wi Willaem grave van Heneghouwen^b, van Holland, van Zeland^c ende here van Vriesland maken cond allen luden dat wi ghegheven hebben ende gheven Janne sheren Clays sone, houdere van desen brieve, hem ende sinen nacomelinghen vijf ende twintich^d lb. Tornoyse, den ouden groten coninx Tornoys^e over zestien penninghe gherekent, elcs sjaers, in rechten liene^f te houdene ende te ghebrukene van ons ende van onsen nacomelinghen, omme groten^g scade die hi in onsen dienste ghenomen hevet ende omme menighen ghetrouwen dienste die hi ons dicke ghedaen hevet ende noch doen zal; ende dese vijf ende twintich pond sjaers zal hi up al dat land dat hiet haymanne land, waer dat gheleghen es ende ons toe behoird ende binnen Walchgheren^h, tote der somme van vijf ende twintich lb. Tornoysⁱ toe alst voerscreven es, uytghenomen dat haymanne land dat Jan Jans sone van Sobburch^j toe behoird. Ende wi ghebieden allen den ghenen die dese voerseyde haymanne hebben dat si Janne voers. gheven ende betalen elcs sjaers hare heymanne ghelt, als si sculdich sien te doene; ende waer dat zake dat sise niet en betaelden alst voerscreven es, so gheven wi ^k hem machte met desen brieve dat hijt halen mach ende in panden met den rechte van den lande voers.

In orkonde desen brieve bezeghelt met onsen zeghele. Ghegheven tote Dordrecht^l des vridaghes voer Sinxchen int jaer ons Heren M^o CCC^o ende XIX^o.