Registers van de Hollandse grafelijkheid 1299-1345

Graaf Willem III verklaart dat in de vierschaar van Middelburg, waar hij zitting hield in aanwezigheid van ambachtsheren, edelen, leenmannen en stadsbesturen van Zeeland, als recht is uitgesproken dat in een geschil vanwege schuld, schade of borgtocht de verweerder vóór de eiser de eed zal mogen afleggen, tenzij die laatste zich eerder had verbonden ten overstaan van zijn heer of van schepenen dan wel met een open brief.

De onderstaande tekst is gebaseerd op afschrift B.

Wi Willaem grave van Henegouwen^a, van Holland^b etc. maken cond ende kenlic allen den ghenen die desen brief zullen sien jof horen lesen dat in onser vierscaerne in Middelburch, daer wi tgherechte zaten, eens rechts ghevraghet was, daer tyeghenwoirdich waren veel heren, edel luden ende wel gheboren ridderen ende knapen, onse manne, onse scepene ende raed van onsen steden van Zeland, of si twie twiden ende die ene den anderen ane sprake van scoude, van scaden of van borchtochte, hoe weder dat beter rechte ware: dat die ghene die die scoud eyschet ende anespreker ware met sinen ede halen mochte ende winnen op den ghenen daer hize^c op eyschet, so die ghene diemen die scoud eyschet met sinen ede daer voren staen mochte ende sine onscoude daer voren doen. Hier op dese woirden^d ghinghen uyt dese heren, ridderen, edel luden, knapen, anders manne, raet ende scepenen van onsen steden voerscreven, ende berieden hem ende quamen weder in ende zeechden dat zijt voer een recht hilden dat die ghene^e daer men die scout op eyschet naer ware met sinen eden daer voren te staen ende met siere onscoude quite te wesen, dan die ghene die eyscher ware^f op hem enich goed met sinen ede halen mochte jof winnen, het en ware dat die ghene diemen tgoed eyschede^g of anesprake hem verliet ende verbonden hadde voir sinen here, jof in vriheden voir scepenen, jof mit sijns zelfs open brief.

In kennessen hier of ende omme dat die goede lude die hier voerscreven sien dit zeechden voir een recht na ons lands recht alst voerscreven es, so hebben wi desen brief open bezeghelt met onsen^h zeghele. Dese brief was ghegheven in Middelburch des donresdaghes voir Alre heylighenⁱ dach int^j jaer ons Heren M CCC ende twintich.