Registers van de Hollandse grafelijkheid 1299-1345

Graaf Willem III beleent heer Jan heer van Kruiningen, ridder, met het steenhuis met hofstede, gracht en nederhof alsmede met andere goederen in het dorp van Kruiningen, welke goederen hem door Jan en diens echtgenote vrouw Margareta vrouwe van Kruiningen waren opgedragen, hij bepaalt de vererving van het leen, en hij stipuleert dat het steenhuis een open huis voor hem zal zijn; de oorkonde wordt op verzoek van heer Jan meebezegeld door de heer van Voorne.

Wi Willaem^a grave van Heynnegouwen^{b c} etc. maken cond etc. dat haer Jan here van Cruninghe^d, onse trouwe ridder, ende ver Margriete^e vrouwe van Cruninghe, sijn wijf, quamen voer ons  ende voer onse manne alse voer onsen neve den here van Voerne^f, borchgrave van Zeeland^g, heren Clays^h Kerving van Reymerswale ende heren Clays van Cats, onse trouwe ridderen, Hesselⁱ van der Kreke^j, Kempe^k Dankarts^l sone ende voer anders onse manne, ende droghen ons op in vrien eyghen haer steenhuys int doirp te Cruninghe metter hofstede, metter graft ende metten neder hove also alse dat betimmert es, ende al hoir ambocht, hofstede ende erve die si hebben int dorp te Cruninghe binnen der nuwer grafte, ende haer deel van der nuwer grafte die omme torp lopet, ende viere ende twintich ghemete lands in den ouden dijc, onder dat si hebben ende noch ghecrighen^m sullen, behouden ons allen dienst die dit voers. lant plach te doene te voren, wilc steen huys, hofsteden, graften, nederhof, ambochte, erve ende hofsteden int dorp voirs. binnen der nuwer grafte ende der nuwer grafte ende vier ende twintich ghemete lands voirs. wi verleent hebben ende verleenen here Janne here van Cruninghe voirs. ende sinen nacomelinghen van ons ende van onsen nacomelinghen te houdene in erfleene, in der manieren dat ⁿ comen sal na siere doit op sinen outste wittachtighen sone jof op siere outster wittachtigher dochter en hadde hi en ghenen sone, ende alse voirt van manne te manne; ende storve enich van den ghenen daer dit voers. goed op quame sonder wittachtich kint, sone jof dochter, so sout comen op den outsten wittachtighen broeder jof op den outsten jof op den naisten manhoeft die wittelic van heren Janne comen ware. Ende dit huys ende alle goed voerscreven sal onse ledich open huys wesen op ende of te vaerne, onse lude daer op te doene ende thuys daer mede te besetten tallen tiden als wijs begheren jof dat wijs te doene hebben.

Ende omme dat wijt hem in deser manieren verleent hebben, so hebben wi hem te kennissen desen brief beseghelt mit onsen seghel. Ende omme die mere sekerhede so heft hi ghebeden onsen lieven neve den here van Voerne^o dat hi desen brief beseghelen wil mit ons^p. Ende wi Gheraerd^q here van Voirne, burchgrave van Zeeland^r, maken cond ende kenlijc allen luden dat wi omme bede willen van heren Janne here van Cruninghe^s hebben wi^t in kennessen van allen desen dinghen voerscreven desen brief beseghelt mit onsen seghel mit onsen lieven here den grave^u voerscreven^v.

Dit was ghedaen ende ghegheven in Middelburch^w des vridaghes na Paesdach int jaer ons Heren M CCC drie ende twintich.