Registers van de Hollandse grafelijkheid 1299-1345

Graaf Willem III bepaalt dat op Walcheren alleen aldaar vervaardigd laken verkocht mag worden, tenzij elders vervaardigde en gekochte stof slechts voor eigen gebruik wordt aangeschaft en niet voor de handel, en met uitzondering van de perioden van de Middelburgse jaarmarkten; tevens stelt hij de boete vast op overtreding hiervan en beveelt hij de baljuw van Middelburg die boetes te innen.

Voor de in de tekst genoemde oorkonde waarin de Middelburgse jaarmarkten worden ingesteld, zie nr. ZE 209 d.d. 1 mei 1323.

Wi Willaem^c grave^d van Henegouwen^e ende van Holland^f maken cond ende kennelic allen luden dat wi, omme onze ghemeens lands ende onzer ghemeenre poirte orbaer van Middelburch^g ende onze land van Walgheren^h te beteren, hebben met onzen ghemenen Rade over een ghedraghen ende ⁱ uytghegheven dat niement wonende in Walgheren jof comende van buten Walgheren, wane dat hi si, en gheen wollen^j laken dat men ghemeenlike heet ghewant^k gheheel bi stucken vercoepen noch sniden en zal in onze land van Walgheren, en si dat dat voers. laken jof ghewant in onze land van Walgheren jof in Middelburch ghemaect ende ghereet si, uytghesteken scaerlaken jof ghewant in onze land van Walgheren, op ene pene van ^l tuintich pond Tornoyse^m, den groeten over zestien penninghe gherekent, ons te betalen van den ghenen die binnen Middelburch wonen ende daer of verwonnen worden bi dien scepenen van Middelburch, ende van den ghenen die buten Middelburch wonen ende daer of worden verwonnen ende bedraghen met drien van onzen mannen; ende alze dicken alze zi jeghens onse voers. ghebod doen ende daer of verwonnen worden alze voers. es, alzo dicke zullen si ons deze voers. pene ghelden. Mar waer dat sake dat eneghe lude tot hoers selves behoef, ⁿ hore wive jof hoer ghesinne om hem te cledene, niet om eneghene coemanscippe te hantieren, enich laken of ghewant wilden bringhen jof doen halen buten onzen lande van Walgheren, van wat steden dat si wilden, dat moghen si doen sonder eneghe boete te verboeren jeghens ons. Ende zo wanneer dat die vriheden van den jaermarcten die wi onzer poirte van Middelburch ghevriet hebben gheduren ende staende zijn, so mach elkerlike die wille alrehande laken ende ghewant van buten brenghen, vercoepen^o ende sniden sonder deze bote te verboren, met sire rechter tolne te ghevene in zulker manieren alze onze opene brieve houden die van den voers. jaermarcten ghemaect sijn. Dit ghebot ende deze ordinancie zal gheduren tot onzen wedersegghen. Ende hebben bevolen ende bevelen met dezen brieve onzen bailiu van Middelburch die nu es of hier na wezen zal dat hi dese vors. boeten zo wanneer^p ende waer dat zi verboert^q worden van onzen weghen narenstelike verware ende inne tonser behoef, daer hi ons jofte den ghenen dien wijt bevelen zullen gode rekeninghe of zal doen.

In orkonde etc. Ghegheven te Middelburch des zaterdaghes voer Alre heyleghen dach int jaer van^r drie ende tvintich.