Registers van de Hollandse grafelijkheid 1299-1345

Graaf Willem III herstelt in overleg met zijn gemene Raad en met het stadsbestuur van Middelburg de begijnen in die stad in hun vroegere staat en eigendommen, waarbij hij regelingen treft voor het bestuur van het begijnhof; de oorkonde wordt meebezegeld met het stadszegel door burgemeesters, schepen en Raad van Middelburg.

Wi Willem grave van Henegouwen^c, van Holland, van Zeeland ende here van Vrieseland^d maken cont ende kenlic allen luden dat wi omme Gode ende om orbaer onzer goeder luden van onsen lande, bi rade ende over een draghen^e van onsen ghemenen Rade ende onser ghemeenre wet van onser poerte van Middelburch, de beghinen van Middelburch^f die^g deser tijt toe ute haren staet hebben gheweist in haren staet weder gheset hebben ende in haer goed, in manieren dat die abt van Middelburch^h metten scepenen van Middelburchⁱ ende metten oudsten ende den vroesten joncvrouwen^j van den beghine hove voirs. kiezen sullen twee^k joncvrouwen dien den hove binnen berechten zullen, van poerten te slutene, van cleedren van doeke te draghene, van wanderinghe te hebbene ende van^l allen stane te berechtene alst voermaels ghewest heift. Voirt zullen die II joncvrouwen met tween mannen diere die wet voirs. toezettet^m al goed dat den hove behoerd, waer dat gheleghen is, ane varden ende berechten also datⁿ tgoed come in Gods dienst, daert^o omme ghegheven is ende het sculdich^p es te comene; ende daer of zullen si rekeninghe doen den abt ende der poerte voirs. alsment van hem beghaert. Ende wi willen dat thof ende die joncvrouwen van den hove voirs. bliven in allen stane ende in alre vriheden alse zi te voren waren.

In orkonde desen brief beseghelt med onsen seghele^q. Ende omme ^r meerre sekerhede soe hebben wi ghebede onsen lieven ende ^s ghetrouwen der ghemeenre wet van onser poerte van Middelburch^t dat si desen brief met ons bezeghelen willen, dat si daer toe helpen dat dese joncvrouwen in^u allen stucken voirscreven ghehouden worden. Ende wi scepenen, burghmeysters ende Raet ghemeenlike van der poerte van Middelburch^v, omme onsen lieven here den grave voirs. ende om dat wi met goeden trouwen daer toe helpen willen dat alle stucken voirs. vast ende ghestade ghehouden worden, zoe hebben wi voer ons ende voir onse nacomelinghe desen brief beseghelt met onsen here den grave voirs. met onser ghemeenre poerte zeghele. Ghegheven in Middelburch^w des saterdaghes na sente Barnabas dach int jaer M^o CCC^o vijf ende twintich^x.