Registers van de Hollandse grafelijkheid 1299-1345

Filips heer Raasz. van Borsele erkent zijn misdrijf jegens graaf Willem III toen hij diens gerecht en schepenen van Middelburg tegenhield op de heerweg in Borsele en hen in hun rechten belemmerde, onderwerpt zich aan de grafelijke uitspraak in dezen en stelt zichzelf en al zijn goederen in onderpand voor het geval hij die uitspraak niet zou volgen; de oorkonde wordt medebezegeld door heer Simon de bastaard van Holland, ridder, en Floris van Haamstede en Boudewijn van Baarsdorp, knapen.

Allen den ghenen die desen brief zullen zien of horen lesen make ic kond ende kenlic ..Philips^b heren Rachen sone van Berselen dat ic van alre broke die ic misdaen hebbe jeghens minen lieven here, ..heren Willame^c grave van Heynnegouwen^d, van Holland^e, van Zeelland^f ende here van Vriesland^g, alse van dien dat ic zijn gherechte ende zine scepene van Middelburch^h kerede op den herewech in Berselen, daer zi hantieren wouden alsulc recht als zi hem vermeten dat horer stede toe behoeren soude van mijns heren sgraven weghen ende van zinen voirvorders; ende van alre broke ende misdaet die ic misdaen hebbe of ghaende mach hebben jeghens die scepene, tgherechte ende jeghens die ghemene porte van Middelburchⁱ om diere zelver sake willen, van hoghen ende van laghen, gheheliken ende al ghebleven^j ben op zegghen mijns lieves heren sgraven van Heynnegouwen^k ende van Holland^l voirs., alsoe dat ic vaste ende ghestade houden zal ende voldoen zoe wat dat hi daer of op mi zegghen zal, te wat tiden dat hi wille, est metten monde of met zinen openen brieve. Ende om dat zegghen te houden ende te voldoen witteliken ende trouweliken, oec hoe ende in wat manieren dat hijt zegghen zal, soe verbinde ic mi zelven ende al mijn goed, liengoed ende anders, soe waer dat gheleghen es, in diere manieren dat ic dat verboird hadde waer dat sake dat ic niet en helde noch en voldede dat zegghen in alre manieren als hijt zegghen zal, in der^m jeghenwordichede heren Symons desⁿ bastards van Holland^o, ridders, Florens^p van Haemstede ende Boudwijns van Baersdorp, knapen, mijns heren sgraven mannen voirs., die over dit verbind waren ende ic ghebeden hebbe ende bidde dat zi desen brief met mi ende op mi bezeghelen willen.

Ende wi Symon, Florens ende Boudijn^q voirscreven om bede Philips van Berselen^r ende om die merer kennessen hebben met hem ende op hem desen brief open bezeghelt met onsen zeghelen bi den zinen. Ghegheven tote^s Valenchijn des woensdaghes na sinte Martins^t dach int jaer ons Heren XXV^o.