Registers van de Hollandse grafelijkheid 1299-1345

Jan van Henegouwen, heer van Beaumont, die zijn echtgenote Margareta, vrouwe van Beaumont, een douarie van 4000 pond Tournois per jaar had geschonken uit al zijn goederen in Henegouwen, waarna zij met toestemming van hem en van zijn broer graaf Willem III afstand had gedaan van de helft van dit bedrag, lijftocht haar ter compensatie met al zijn opbrengsten uit de tol in Zeeland waarover eerder heer Hendrik Buffel de beschikking had, behoudens de rechten waarmee anderen zijn beleend; de oorkonde wordt meebezegeld door de graaf, die tevens instemt met de schenking.

Wi Jan van Heynnegouwen^a ende here van Biemond^b maken cond ende kenlic allen den ghenen die desen brief zullen zien jof horen ^c. Want wi onser liever ghesellinnen Margrieten, vrou van Biemont^d, ghemaecht^e ende bewiset hadden toit hare duarien up al onse goet dat wi in Heynnegouwen hebben vier dusend pond Tornoyse^f sjaers in tenemen, van den wilken vierdusendtich ponden voirs. si bi onsen goed denken ende bi haren consente ende vrien wille ende oec hare trouwen, ende bi goeddenken ende consente ons liefs heren ende broeder, heren Willaems^g graven van Heynnegouwen, van Holland^h, van Zellandⁱ ende here van Vriesland, die twie dusendtich pond Tornoyse^j sjaers voirnoemt of ghelaten hevet ende hoer buten ghedaen, zoe hebben wi haer ghemaecht^k ende bewiset te duarien ende bilevinghe al onse goed van der tolne in Zeelland^l dat sheren Heynrix Buffels was, wair dat gheleghen es, behouden allen den ghenen die dair of verlient zien haers rechts, sonder arghenlist.

Ende om dat wi willen dat dit vaste ende ghestade blive ende om die meerre zekerhede, zoe hebben wi ghebeden onsen lieven here ende broeder heren Willame^m grave voirnoemt dat hi dit met ons wil bezeghelen. Endi wi Willaemⁿ grave van Heynnegouwen etc., om bede ^o heren Jans van Heynnegouwen ons lieves broeder, ende om dat wi willen dat^p dit vaste ende stade^q blive, hebben dit gheconsentiert ende met hem bezeghelt. Ghegheven tote Dordrecht des donresdaghes na onser Vrouwen dach ter gheboert in jaer ons Heren M^o CCC^o zes ende twintich^r.