Registers van de Hollandse grafelijkheid 1299-1345

Graaf Willem III verheft zijn klerk Gerard Alewijnsz. uit Leiden, diens zoon Alewijn en hun nakomelingen in de adelstand, in verband met Gerards aanstelling tot ambachtsheer in Zwijndrecht, welke heerlijkheid slechts door edelen kan worden uitgeoefend; de oorkonde wordt medebezegeld door heer Gerard heer van Voorne, burggraaf van Zeeland.

Wi Willem^a grave van Heynnegouwen^b etc. maken cond etc. dat Gherard^c Alewijns sone ute Leyden, onse clerc, van ons ghenomen heeft in Zwijndrecht te dikene een zestiendendel van al den lande met ambochte ende met alle sinen volgher, ende omme alsulken pacht ende in allen den voirwairden dat die ander ambochts heren Zwijndrecht^d hebben ghenomen te diken. Ende want ambocht niemant bedriven en mach dan edel lude, ende Gherard^e voirs. ^f ende Alewijn sijn sone ghebrec hebben van hare edelheyt, zoe hebben wi omme menighen trouwen dienst dien ons Gherard^g voirs. ghedaen heeft ghegheven hem beyden van onser graveliker macht edelhede; ende willen dat si al des rechts ghebruken ende ghenieten ende alle rechte hantieren als edele lude sculdich sien te ghenieten ende te hantieren na den rechte van onse lande van Zeeland, ende hare nacomelinghen hoir edelheden van hem hebben alsoe als sier of gheboren sien.

In orkonde desen brieve^h etc.; ende in meerre kennessen zoe hebben wi onsen neve heren Gherardeⁱ here van Voirne, burchgrave van Zeeland^j, desen brief met ons doen beseghelen. Ende wi Gheraird^k here van Voirne, burchgrave van Zeeland, omme onses heren sgraven wille ende omme die meerre kennisse van den stucken voirscreven zoe hebben wi desen brief met onsen here den grave voirnoemt beseghelt met onsen zeghele. Ghegheven in ^l Middelburch op den meyedach int jair ons Heren M° CCC°^m XXXII°.