Registers van de Hollandse grafelijkheid 1299-1345

Graaf Willem III verpacht Willem de Vriese de 22 gemet tienden in Vinninge die diens vader heer Willem de Vriese van Oostende, ridder, hem daartoe had opgedragen.

Wi Willem^a grave^b van Heynnegouwen^c, van Holland^d, van Zeeland^e ende here van Vriesland^f maken cond allen luden dat here Willem^g die Vriese ridder van den Oestende voir ons quam ende voir onse manne ende droich ons op tote Willem Vriesen behoef sijns zoens twee ende twintich mete tienden ligghende in Vinninghen, die hi van ons in pachte helt; wilken tiende voirscreven wi verliet hebben ende verlien Willem Vriesen voirs. van ons in pachte te houden, behouden elken anderen syns rechts, in allen manieren dat die brief hout die bi wilcoren van ons ende van onsen mannen van Zeeland^h dair of bezeghelt is; ende hier of sel hi ons jaerlix te pachteⁱ gheven neghen ende twintich scellinghe Vlaems, eenen ouden groten Tornoysen^j over tien penninghe ende een hallinc Vlaems, die maken in Hollanschen^k twee ende twintich scellinghe ende eenen penninc Hollands^l.

In orconde desen brieve bezeghelt met onsen zeghele^m. Ghegheven in Middelburchⁿ des dinxendaghes na sinte Victoers^o dach int jair ons Heren M° CCC° vier ende dortich.