Registers van de Hollandse grafelijkheid 1299-1345

Graaf Willem III verleent de abdis en het convent van Rijnsburg voor hun ambacht te Serooskerke, groot 164 gemet steenschietens, vrijstelling van alle heervaart, schot, bede en diensten, uitgezonderd dijk- en watergeld; de oorkonde wordt medebezegeld door zijn zoon Willem van Henegouwen, graaf van Zeeland.

Willaem ..grave van Heynnegouwen^a, van Holland^b ende here van Vriesland^c maken cond allen luden dat wi omme Gode ende omme goede jonste ende omme dienste die ons religiose vrouwen die abedisse ende dat ghemeene convent van Reynsburch ghedaen hebben sulke gratie doen als hier na bescreven staet, dats te weten al sulken dienste als zi ons sculdich sijn van haren ambocht in Walgheren tote Ser Allarts kercke, dat te stiene sciet hondert ende^d vier ende tsestich ghemete, van deser tijd voirt vry gheven van alre herevairt, van allen scote ende van alre bede ende van allen dienste, uyt ghenomen dijcghelt ende waterghelt.

Ende omme dat wi willen dat dese ghifte hem ende horen nacomelinghen van ons ende van onsen nacomelinghen altoes wittelic ende trouwelike ghehouden werde, soe hebben wi desen brief open bezeghelt mid onsen zeghele; ende in meerre kennisse soe hebben wi Willaem van Heynnegouwen^e ..grave van Zeelland^f, onsen sone, desen brief mid ons doen bezeghelen. Ende wi Willaem van Heynnegouwen^g, ..grave van Zeelland^h, omme wille ons lieves heren ende vaders ende omme die meerre kennisse soe hebben wi desen brief mede bezeghelt mid onsen lieven here ende vader voirscreven. Ghegheven in den Haghe des donresdaghes na onser Vrouwenⁱ dach nativitas int jair ons Heren M° CCC° ses ende dertich.