Registers van de Hollandse grafelijkheid 1299-1345

Graaf Willem III verpacht de gruit van Dordrecht voor de tijd van vier jaar aan Jan heer Gillisz. en Gijsbrecht Malegijs, poorters van Dordrecht, bepaalt de boeten bij overtreding en geeft garanties in geval van onkosten en schade.

De onderstaande tekst is gebaseerd op afschrift B.

Wi Willaem^c grave van Henegouwen^d, van Holland^e etc. maken cond allen luden dat wi verpacht hebben Janne sheren Gillijs^f sone ende Ghisebrecht^g Maleghijs^h, onsen poirters van Dordrechtⁱ, onse grute tote Dordrecht in alle den rechte dat se onse voerders^j grave van Holland^k hier te voren ghehouden hebben, sonder arghenlist, dat es te wetene in manieren alse hier na ghescreven staet. Waer dat zake dat yemende brouwede binnen der vrihede van onser poirte van Dordrecht zonder die grute diemen ghift in onse gruythuys Tordrecht^l, die zoude verboren dat bier ende drie pond also dicke als hijt dede ende ment op hem proeven mochte. Waer oec yemant die grute brochte binnen der vrihede van Dordrecht, die verboirde tien pond Hollands^m ende die grute alse dicke als hijt dede ende ment op hem proeven mochte. Voerd waer yemand die grute makede sonder int gruythuys, die verboirde tien pond Hollands also dicke als hijt dede ende die grute medeⁿ ende ment op hem proeven mochte. Voird zalmen van elken hoede gheven tien groete Tornoyse^o. Vord so zullen zi gheven zulke grute alsmen toet desen^p daghe ghegheven hevet. Ende desen pachte ende dese voerseyde grute zullen zi houden te pachte van des zonnendaghes na ons Vrouwendach te half oeste^q die naist coemt ^r, ^s vier jaer dair na volghende elcs jaers omme twie hondert ende viertich pond Hollands; ende van desen pachte voerseyd zullen si ons betalen tgheld van den eersten ^t jare tote onser Vrouwendaghe ter lichtmisse^u, ende also van jare te jare tonser Vrouwendaghe ter lichtmisse also vele ghelts voers. tote dier tijd dat die pacht van den voerseyden jare uyt es. Ende hier bi zullen wi hem doen levren^v onse gruythuys ende die alamen die ten gruythuse^w horen zonder horen coste; ende so wat dat si dair an leyden ende dat huys ende^x die alamen niet omberen^y en mochten, die^z zouden wi hem doen of corten van horen pachte, ende dat te versiene ende te levren bi onsen baliu ende rentemeyster van Zuytholland^a' na dien dats behoeven zal. Voerd waer dat zake dat binnen deser tijd enich ghemene oirloch woirde jof datmen also vele brouwede aels binnen onser poirte van Dordrecht, waer bi dat sier te zere mede gheaechtert^b' waren ende an verliesen souden, dat zouden wi zelve versien alse redelike ware. Ende ombieden ende bevelen narenstelike onsen baliu van Zuytholland^c', scoute, scepenen ende Raed van onser voerseyder poirten dat si onse gruyte voers. houden ende doen houden in alsulken rechte ende op zulke boete alse hier voren ghescreven staet.

In oirkonde desen brieve etc. Ghegheven Tordrecht^d' des zonnendaghes na half meye int jaer ons Heren M CCC twie ende twintich.