Registers van de Hollandse grafelijkheid 1299-1345

Graaf Willem III gelast Jan heer Gillisz., rentmeester van Zuidholland, aan Arnoud van Kraaienstein 80 pond Hollands uit te betalen, in twee termijnen, welk bedrag Arnoud heeft geaccepteerd in plaats van de achterstallige rente over dertig jaren uit de tol van Niemandsvriend die de graaf hem schuldig was.

De onderstaande tekst is gebaseerd op afschrift B.

Wi Willaem^a grave van Henegouwen^b, van Holland^c etc. an Janne sheren Gillijs^d zone onsen rentemeyster van Zuytholland^e saluyt. Want ons Arnoud van Crayenstene^f ghelovet hevet alse om achterstelre^g rente die hi ons eyskende es van dertich jaren tachter nu te sinte Bamesse^h die naist comet, alse van tien pond Hollandsⁱ sjaers die hi zeghet dat hi hevet alle jare te sinte Bamesse op onse tollen te Niemands vrient^j, van der wilker achterstelre rente voerseyd die hi ons eyskende es, dair die leste termijne of wesen zal te sinte Baven daghe^k die naist coemt, die biscop van Zuden ende hair Symon van Benthem^l van onsen weghen zien met Arnoud van Crayenstene^m over enen ghedraghen dat wi hem betaillen zullen tachtich pond Hollandsⁿ, die ene helfte te Kersdaghe die naist coemd ende die ander helfte te Paeschen daer naist^o comende^p; ende hier omme^q hevet hi ons quite ghescouden van alre achterstelre rente die wi hem sculdich sien jof sculdich mochten wesen tote sint Baven dach toe die naist comet, alse van siere rente die hi hevet op Niemands vriend^r. Waer omme, rentemeyster, dat wi ju onbieden dat ghi Arnoude voernoemd betaild die tachtich pond Hollands^s te zulken daghe alse voerscreven es; ende des en laet niet, wand wi u van also vele quiten zullen in juwe eerste rekeninghe met desen brieve.

Ghegheven in die Haghe des donresdaghes^t voir sinte Bartholomeus^u dach int jaer ons Heren dusent drie hondert twie ende twintich.