Registers van de Hollandse grafelijkheid 1299-1345

Graaf Jan II belooft de poorters van Schoonhoven dat hij geen afzonderlijke vrede met heer Nicolaas van Kats zal sluiten en dat hij hen zal vrijwaren van alle gevolgen voortvloeiend uit hun zelfverdediging tegen heer Nicolaas; voorts neemt hij de poorters op in zijn bescherming en geeft hij hun toestemming de stad van vestingwerken te voorzien.

De onderstaande tekst is gebaseerd op afschrift B.

Wi Jan grave van Heynnegouwen^a etc. maken cond etc. dat wi beloven ende verbinden^b ons jeghens onsen ghetrouwen luden dien poirteren^c van onser stede van Scoenhoven^d ghemeenlike dat wi nimmermeer en maken pays noch vrienscippe met heren Niclayse van Cats^e alse van den misgripe dat hi weder ons ende weder onse goede lude van Scoenhoven mesgrepen hevet, het en sie bi onser goeder lude wille van Scoenhove^f ghemeenlike ende bi horen rade; ende waer dat zake dat here Liclays van Cats of enich mensche van sinen halven misdade op onse goede lude van Scoenhoven voirs., so wat dat si weder deden op heren Liclayse van Cats of op die zine noetwers^g om hem tebescermen^h, daer gheloven wi hem luden van Scoenhovenⁱ scadeloes ende costeloes ende binnen lands vriliken te^j houden sonder enich^k weder segghen. Voird soe nemen wi in onsen rechte bescermesse^l alle die ghene die poirters sien, die hier na^m poirters worden zullen in onser voirseyder stede van Scoenhoven, beyde hoir lijf ende hoir goed, ende beloven hem terechte te houden ende te bescermen van desen daghe voirwaert jeghens elken mensche, uyt ghesteken ⁿ alle die poirters van Scoenhoven die hem met heren Liclayse van Cats gheset hebben of hier na setten zullen weder ons of weder onse goede lude van Scoenhove^o voirs.^p Voirt^q so gheven wi oirlof ende volle macht onsen goeden luden van Scoenhove^r dat si onse voirseyde stede van Scoenhove^s vesten moghen ende vaste maken so waer dat zi willen alse hem goed dinken^t zal bi onsen rade, ende daer toe so gheloven wi hem te sekeren ende te helpen weder elken mensche die hem dat wederstonde op dat iement wederstaen wilde.

Ende omme die ^u grote ghetrouwichede die wi vonden hebben in onsen goeden luden van Scoenhoven voirs. ende om dien goeden dienst die^v zi ons ghedaen hebben in onsen oirloghe, so binden wi ons ende alle onse nachomelinghe graven van Holland^w alle dese voirseyde dinghe te houdene ende wel te volcomene alsoe zi hier voirscreven staen. In oirkonde etc. Ghegheven Tordrecht^x int jaer ons Heren M CCC ^y sonnendaghes voir sinte Bartolomeus^z dach.