Registers van de Hollandse grafelijkheid 1299-1345

Pieter heer van der Lek verkoopt Willem de Molenaar heer Jansz. en Jan de Molenaar Allardsz. het ambacht Brandwijk en Gijbeland met alle tienden en rechten voor 400 pond Hollands, met de bepaling dat de kopers twee jaar dat goed ongestoord mogen bezitten waarna Pieter vier jaar de gelegenheid heeft het terug te kopen, en dat indien dat laatste niet gebeurt, Willem en Jan het goed voortaan in recht leen van hem zullen houden; graaf Willem III belooft de kopers in bescherming te zullen nemen en zegelt de oorkonde mee.

Wi Pieter here vander Lecke maken cont ende kenlic^c allen luden dat wi vercoft hebben Willame den Molnaer^{d e} haren Jans sone ende Janne den Molnaer^f Alaerds^g sone onse ambocht van Brandwijc ende van Ghibenland^h met allen onsen tienden, groete ende cleyne, gheleghen binnen den voirseyden ambochte, ende met allen rechte dat wi daer in hebben, omme vier hondert pond Hollandsⁱ die si ons witlike ende wel betaelt hebben, ^j in alsulker manieren als hier na^k bescreven staet. Dat is te verstane dat si in desen voirseyden goede gaen zullen te Bamysse^l die naest coemt^m ende daer in bezitten twe jaer vrilike sonder uytdoen, ende tenden desen twe jaren so hebben si ons ontruemt dat wi dat voirghenomde goed weder teghen hem quiten moghen met vier hondert ponden Hollands, ende dese quitengheⁿ sal gheduren viere jare tenden desen twen jaren voirseyt, also dat wijt quiten moghen elcs jaers op sinten Baven dach met vier hondert ponden Hollands, ende die te betalen te Brandwiker kerke te wilken jare wi willen van den ^o vieren voirs. Ende waert^p dat^q wi dese quitinghe nit^r en deden op sinte Baven dach also alst voirs. is, so zullen Willaem ende Jan voirghenoemt dat goet vrilike besitten dat naest^s jaer dat daer na coemt; ende waer dat sake dat wi dese quitinghe niet en daden binnen den vier jaren comende nae den twen voirs., so zullen zi Willaem ende Jan jof haer nacomelinghe dat voirghenoemde^t goed houden van ons ende van onsen nacomelinghen te rechten erflene, jof een van hem twein dien zi over ein draghen onder hem, sonder arghelist.

Ende omme dat wi Pieter here van der Lecke voirghenoemt ende Henric^u van der Lecke^v willen dat alle dese voirscreven vorwaerde desen voirghenoemden Willame ende Janne ende haren nacomelinghen witlike ende welghehouden^w worden, so hebben wi desen brief open beseghelt met onsen seghelen. Ende voirt omme die meerre vestenisse van deser dinc so hebben wi Pieter here van der Lecke ende Henric^x van der Lecke ghebeiden^y ende bidden onsen lieven gherechten here den grave van Holland^z dat hie desen brief beseghelen wille, ende Willame ende Janne voirghenoemt ende hare nacomelinghen in den voirseyden goede houden ende besterven wille nae alre vorwarde^a' alst voirscreven is. Ende wi Willaem grave etc. omme bede wille des heren van der Lecke ende Henrics^b' sijns soens hebben wi desen brief beseghelt met onsen seghele, ende gheloven Willame ende Janne ende haren nacomelinghen te houden ende te bescermen in den voirs. goede na allen vorwarden alst voirscreven is.

Ghegheven in den jare ons Heren M^o CCC^mo XXV^o des sondachs na sinte Margrieten daghe.