Registers van de Hollandse grafelijkheid 1299-1345

Graaf Willem III verhuurt het veen geheten de Zwaluwe, verdeeld in vijf blokken, voor de tijd van vijf jaar aan Hugo Loef, Nicolaas Bloc, Jan Snellaard en diens zoon Jan Rode, overeenkomstig de rechten die Gerard van Wieldrecht daarop had.

Wi Willaem^a grave van Henegouwen^b etc. maken cond allen luden dat wi bi Zegher Willaems^c f.^d van Wendelsnesse^e onsen moer diemen hiet die Zuaelwe verhuert hebben van mid maerte int jaer van XXVII naest comende, vijf jaer daer na durende, in alle dien rechte dat Gheret^f van Wieldrecht te houden plach ende hair toe ghebrocht hevet. Int eerste hevet Hughe Loef ghehuert die overste drift van der Zuaelwen voers. om XXXII lb. ende X scellinghe Hollands^g ende een vierdendeel van eere waghe cazen sjaers; Clais^h Bloc den Riethoec drift om XXIX lb. Hollands ende een vierdendeel van eere waghe cazen sjaers; item die zelve Claisⁱ Bloc die hernessen^j buten dijcs om VI½ lb. Hollands sjaers; voerd Jan Snellaerd dien Poel hoec drift om XXVI lb. XV s. Hollands ende een vierdendeel van eere waghe cazen sjaers; voerd Jan Rode Jan Snellaerds sone die dijc drift om XXI lb. ende V s. Hollands ende een vierdendeel van eere waghe cazen sjaers. Ende hier of zullen si onsen rentemeister alle jare betalen na der note een derdendeel te sinte Maertijns^k misse in den winter^l, ende die twie dele binnen meye daer naest comende, ende deze hure voerscreven gheloven wi hem ende den ghenen dien zize mede gheven zullen jof horen borghen, waerd dat si zelve die hure niene betaelden^m, te waren deze vijf jare voerscreven in allen manieren alse voerscreven is.

In orkonde etc. Ghegheven in die Haghe up sinte Laurensⁿ avonde int jaer van^o zesse ende twintich.