Registers van de Hollandse grafelijkheid 1299-1345

Graaf Willem III verkoopt Jan heer Gillisz. de helft van huizen, erven en land die hem waren toegevallen na de dood van Hein Berwoudsz., die dit goed als onderpand had gezet en niet had gelost.

Wi Willaem^a grave ^b etc. maken cond etc. dat ons ane comen es die husinghen ende die erven daer Heyne Borwouds^c sone int ende^d op woende in sinen lesten live, met dertich morghen lands die daer toe behoren met allen rechte, voir alsulc ghelt als ons Heyne Berwouds zoen sculdich blef in sinen lesten live daer wi dit voirghenoemde goed voir ghepand^e hadden; ende die ene helfte van ^f husinghen, van erven ende van lande voirnoemt hebben wi vercoft Janne heren Gillijs ^g, die houder es van desen brieve, daer hi ons of betailt heeft den eersten penninc ende den lesten. Hier bi gheloven wi hem die ene helfte van husinghen, van erven ende van lande voirnoemt te waren ende te vrien van^h allen commer ende van alrehande antale jeghens elken mensche, ende ombieden onsen baliuwe die nu es in Zuythollandⁱ jof die namaels wesen ^j zullen dat si Janne heren Gillijs soen voirnoemt ende sinen nachomelinghen in desen voirnoemden goede houden ende bescermen jeghens elken mensche van onsen weghen.

In oirkonde etc. ghegheven int jaer ons Heren M CCC zes ende twintich, des zatersdaghes na Kersdaghe.