Registers van de Hollandse grafelijkheid 1299-1345

Graaf Willem III schenkt Gerard Heinen Rottiersz. van Leiden, zijn maarschalk, voor de duur van diens leven de opbrengst van de botermaat van Dordrecht, uitgezonderd de 5 pond Hollands die Elizabeth van Waarde al gedurende haar leven daaruit ontvangt.

Vgl. nr. ZH 290.

Wi Willaem^a grave van Heynnegouwen^b etc. maken cond ende kenlic allen luden^c dat wi ghegheven hebben ende gheven Gheret Heynen Rottiers sone van Leyden, onsen mairscalc, omme trouwen dienst die hi ons ghedaen hevet onse buttermate van onser stede van Dordrecht^d vrilike op te bueren ende te ghebruyken alse langhe als hi levet al verval dat verscinen ende vervallen mach van der butermate voirs., uut ghenomen vijf pond Hollands^e sjaers die wi Lizebetten^f van Wairden, Hannekins^g wijf ons messagiers, ghegheven hebben toit haren live ende hoir bewijst hebben med onsen brieven op die buttermate voirscreven; ende wair dat zake dat Lizebet^h voirnoemtⁱ storve ende Gheret^j Heynen zone voirs. langher in live ware, soe soude Gherijd voirs. van dier tijd vort alse langhe als hi levede al verval dat verscinen ende vervallen mach van der voirseyder buttermate ghehelix opbueren ende ghebruken sonder yemand^k dair of yet uute te reeken jofte gheven. Voirt wair dat zake dat Gheret^l voirs. of lossede die vijf pond ^m sjaers die wi Lizebetten voirs. med onsen brieven dair op bewijst hebben, soe soude hi alse langhe als hi inⁿ live ware ghehelix opheffen alse voirs. es al dat verscinen ende vervallen mochte van der buttermate voirscreven. Ende nae Gherijts^o doit voirs. soe sel dese voirseyde buttermate vry ende quite weder comen ane ons jof an onsen erfnamen.

In orkonde deser dinghe zoe hebben wi desen jeghenwoirdighen brief open bezeghelt med onsen zeghele^p. Ghegheven tote Sognyes des manendaghes nae sinte Odulfs dach int jaer ons Heren M CCC acht ende twintich.