Registers van de Hollandse grafelijkheid 1299-1345

Graaf Willem III verleent de inwoners van het dorp en de polder van Strienemonde tolvrijheid voor hun eigen goederen in heel zijn land, en voorts een aantal rechten betreffende de rechtspraak.

Wi Willaem^a grave etc. maken cond etc. dat wi ghegheven hebben ende gheven onsen luden die wonen jof namaels wonen sullen op onse dorp ende in onsen polre van Strienemonde dat si tollen vri varen sullen mit horen eygheliken goede over al in onsen lande; voirt dat onse rentemeester van Suitholland^b, wie hi es, hoir rechter van onsen weghen wesen sal jof die ghene dien hijt beveelt; voirt so wie dair vochte dat hire sijn lijf mede verboirde, ^c dat sijn wijf dat eyghelike goed behouden soude; voirt dat die rechter ende die scepen om ruste ende om oirbair ons dorps voirs. koren maken moghe tote viertich scellinghe Hollands^d toe toit onser behoef; voirt^e alle boeten beneden tien scellinghe ^f jof te^g tien scellinghe ^h toe sullen die bure die helfte of hebben omtⁱ dorp mede te beteren, ende wi die ander helft. Dit sal gheduren tonsen weder segghen toe.

Ghegheven te^j Dordrecht^k in Alre Goids^l heylighen daghe int jaer ons Heren M CCC ende XXX^o.