Registers van de Hollandse grafelijkheid 1299-1345

Willem heer van Horn en Altena en rechters, schepenen, gezworen Raad en gemeente van de poort van Woudrichem beloven graaf (Willem III) van Henegouwen en Holland te zullen vrijwaren wegens diens borgstelling voor hen bij goede lieden te Brussel, aan wie zij een lijftocht hebben verkocht waarvan de opbrengst ten goede is gekomen aan het algemeen nut van henzelf, de poort van Woudrichem en het land van Altena; de oorkonde wordt meebezegeld door vijf met name genoemde personen.

Wi Willem^a here van Horne ende van Althena ende wi rechtere, scepenen, ghesworen^b Raet ende alle die ghemeynte van der porten van Woudrichem maken cond ende kenlijc al den ghenen die desen brief zelen zien of hoeren lesen dat wi ende jeghelijc van ons voer al ghelovet hebben ende gheloven met desen selven brieve ende sien sculdich eenen hoeghen edelen vourste^c, onsen lieven here den grave van Heynegouwen^d ende van Hollant of sinen arfnamen of sinen nacomelinghe, quijt, vri ende scadeloes te houden van allen ghelooeften ende verbonde die hie^e voer ons gheloeft ^f heeft ende daer hi voer ons verbonden is ane goede liede die te Brusselen porteren of portersen of wonende sien, als van lijftochte dien wi hem vercoft hebben ghelijc den brieven spreken die die goede liede van Brusselen hebben op die lijftocht, welke brieve wi hem beseghelt hebben met onsen zeghelen ende ghebeden hebben tebeseghelen onsen lieven here den grave voernoemt met ons, die die brieve omme onsen wille beseghelt heeft^g; want wi hem ghetoent^h hebben ende gheproeft ende wel doen verstaen als waer is datⁱ wi dat ghelt sculdich^j, daer wi die lijftocht omme vercoft hebben ende dat wi daer of ghenomen hebben ende wat wi daer toe ghedaen hebben, met goeden voerrade ghedaen hebben ende belacht hebben ende bekeert in onsen ghemeynen oirbare profijt ende voirdeel ende in onse beste van ons heren van Hoerne ende van Althena ende van ons ghemeynre porten van Woudrichem voerghenoemt^k ende sghemeyns lands van Althena.

Ende om dat wi dese dinghen vast ende stade houden willen, zoe hebben wi dese brieve doen beseghelen met onsen zeghel in ghetuchnisse der^l waerheden, ende hebben^m ghebeden eersamenⁿ liede ende besceyden Enghebrecht van Andels, Vastrarde van Ghiesene, Janne Borgreve^o, Emonde van Emmechoven ende Diederic van Cranendonch^p, want hem condich is dat wi dese lijftocht vercoft hebben ende tghelt dat daer af comen^q es besecht ende bekeert hebben in sonderlinghe oirbaer ende profijt ende openbare vordele ende beste van onse, onser ghemeynre port vorseit ende tslants^r van Althena, dat si hoer zeghelen te zamen met den^s onsen ^t hanghen ane dese brieve in ghetuchnisse der waerheyden. Ende wi Enghebrecht van Andels, Vastrard van Ghiesen, Jan Borgreve, Emond van Emmekoven^u ende Diederijc^v van Cranendonch, want wi kenne ende ons^w kondich is dat dese lijftocht vercoft es met goeden voerrade ende tghelt daer^x of wale ende bescedelijc belacht, bescolt ende bekeert es in sonderlinghe ende ghemeenen orbare, profijt, voerdeel ende beste tsheren^y van Horne ende van Althena ons liefs heren, der ghemeynre port van Woudrichem voerscreven ende tsghemeens lants van Althena, soe hebben wi om beden wille ons liefs heren tsheren van Horne ende van Althena ende rechters, scepene, gheswoerne Raet ende alle der ghemeynten der porteren van Woudrijchem^z onse zeghelen zamen met den hore ghehanghen an desen brieve in kennissen ende stidicheyt der waerheyden.

Ghegheven int jaer ons Heren dusent driehondert dorticht ende een, in sente Marien dach Magdalenen^a'.

Ista littera est sub Enghelberto^b'.