Transcriptie

Au camps à Neer, le 18e juillet 1635

Si ce n’estoit pour asseurer Votre Excellence de la parfaicte santé de Monseigneur le Prince, je me dispenseroy de luy donner ceste importunité, sans qu’elle eust subject de s’en plaindre. Car nous ne faisons rien et nous laisse-on aussi en paix. Fors que noz françoiz se hastant un peu au fourrage par des chemins incognuz, tombent assez souvent entre les mains de noz voisins, les Croates, qui dès hier ont passé la rivière, en nombre de quelques cinq régiments. Par où le païs de Juliers ira du pair aveq le misérable Brabant, où ces diables ont faict du ravage incomparable, pillants jusques à leurs propres gens, quand ils les trouvent chargez de quelque butin. Hier seulement nous avons sceu les particularitez de la rendition de Diest, et comme le coronel Wijnberghe y a esté en danger d’estre assommé par les bourgeois et les femmes mesmes, s’il n’eust rendu la ville, après que desjà lesdits bourgeois eurent faict secrètement leur capitulation, et les soldats repoussé deux attaques furieuses, où le capitaine Charles a esté tué. En peu de jours nous jugerons du reste de l’année, suivant les démarches de l’enemi, qu’on dit en vouloir à Maestricht.