Transcriptie
Au camp à Steken, le 25e juillet 1646
Ensuitte des résolutions d'hier, l'armée a commencé à marcher aujourd'huy à la pointe du jour, et nonobstant les grandes chaleurs est entrée ceste apres-disnée au quartier d'assez bonne heure.
Son Altesse n'a pas voulu donner lieu aux persuasions qu'on luy a faictes de prendre l'ayse de son carosse. Ella a monté dès le commencement à cheval, et y est demeuré jusques à la fin, mesmes après avoir reposé une heure icy, est encor remontée à cheval, pour veoir l'assiette des quartiers. Puis s'est faict faire la barbe pour se rafreschir, le tout l'accoustumée et, grâces à Dieu, il ne paroist pas qu'elle en soit plus incommodée que si elle avoit demeuré tout le jour en sa chambre. En chemin elle a disné à la Halte, et a eu pour compagnie M. le Mareschal de Gramont et autres seigneurs de ce secours.
Tout présentement lettres vinrent du Wagemeester, disant que les chariots sont tous arrivez à Philippine aujourd'huy et de la venus au Sass. On luy ordonne donq de les amener icy dans demain et sera donné ordre à leur convoy, tant de cavallerie que d'infanterie.
Pour autant que nous apprenons encor des enemis, il semble qu'ils nous feront l'honneur de mespriser les François, en sorte qu'ils joindront leurs principales forces contre nous. Il fault veoir à quoy cela montera et ce qu'il y aura moyen d'y opposer. V.A. sera successivement advertie de tout. Pour l'attente de ces chariots des chevaulx d'artillerie, nous ne pourrons bouger demain d'icy.