Transcriptie
Au Camp à Lokeren, le 1 d'aoust 1646
Ensuitte du commandement qu'il a pleu à Votre Altesse me faire l'honneur de me donner de sa main, j'ay beaucoup entretenu Son Altesse sur le subject de ceste lettre de Madame la princesse de Bohème, mais pour conclusion n'ay pu obtenir autre chose, sinon qu'il fault y faire response en belles paroles tant qu'il est possible comme en effect ladite letttre est escritte avec de fort grandes civilitez et submissions. Au fonds Son Altesse n'a plus estre disposé à s'entreposer en aucune sorte envers la Cour Provinciale, et quand je luy ay remonstré que la princesse Catherine avoit tant faict les mesmes instances, il m'a respondu qu'il n'y avoit point de haste, et qu'il valoit mieux d'encor attendre quelque temps dans lequel, quoyque j'aye faict cognoistre que les adjournemens publiqs continueroyent tousjours, je n'ay rien pu gaigner que ce que dessus. Si Vostre Altesse pouvoit trouver bon que madame Elizabeth commandast que le secretaire Maurice m'instruisist de l'estat où est l'affaire, à scavoir si elle est encor entre les mains de la Cour, ou bien si ceux de Hollande sont evoquée à ceux, cela pourroit donner icy nouveau subject de parler, et faudroit-il véritablement diriger les interventions de Son Altesse à l'advenant. [zie: http://www.historici.nl/Onderzoek/Projecten/Huygens/brief/nr/4389 en http://www.historici.nl/Onderzoek/Projecten/Huygens/brief/nr/4418]
Nous sommes tousjours dans l'incertitude de ce que font les amis et les enemis. Ceux-ci changent tant de fois de poste, qu'il n'y a moyen d'en faire aucun estat ny jugement asseuré. On nous assure cependant que 30 bateaux chargez d'infanterie ont passé de Gant à Bruge pour accourrir aveq bon nombre de cavallerie au besoin vers Wijnocxerghe et Duynkercke, l'un et l'autre se disant investi par les François, qui est chose assez difficile à croire, quoyqu'un homme déclare en avoir veu lettres escrites par le greffier de Duynkercke au grand Baillif de Gant.
Jan Remacq, qui s'est tant signalé à ceste dernière prinse de Tirlemont, fut blessé hier par une partie d'infanterie enemie, comme il en conduissoit une de cavallerie du costé de Gant et l'on tient la blessure assez dangereuse, qui est grand domage.
Ces messieurs de Münster arrivèrent hier au soir icy et, ce semble, partiront demain. Si je sçavoy par où faire passer mes lettres en seureté, je me donneroy l'honneur d'accourrir à Votre Altesse de plusieurs choses qui ne doibvent pas aujourd'huy se mettre sur les papiers. Mais nous sommes en lieu où nous ne tenons pas seulement nos convoys fort asseurez, s'ils ne sont bien forts, ce qui m'arrive par tous les jours. Ainsi fault-il que j'escrive tousjours aveq retenue et par provision, pour quand il y viendra commodité d'envoyer.
Son Altesse s'est assez bien trouvée hier et aujourd'huy, mesmes avec de l'appétit plus que par le passé et plus de vigueur de mémoire, mais il y a des intervalles en sa disposition. Si Monsieur Knuyt a l'honneur de veoir Votre Altesse en passant, il luy dira en quelles peines je me trouve souvent.
Voyci que deux gentilhommes François qui ont esté prisonniers auprès des enemis rapportent au Mareschal de Grammont, que Monsieur de Lorraine est mort aujourd'huy de poison. Piccolomini le leur ayant dit de sa bouche aveq ceste circonstance que comme il eust envoyé quérir une siene petite fille, qu'il aymoit fort, comme il la vit habillé tout de blanq, il avoit dit: "ha je suis mort, je ne sçay par quel augure".