Transcriptie
Au camp à Saint-Gilis, le 26e aoust 1646
Monseigneur le Prince Guillaume, ayant observé qu’à diverses nuicts les Espagnols sont venu roder icy autour du quartier de nos François, de là se retirant vers Lokeren, soubs la faveur de quelque infanterie, a eu permission d’aller étaler ces proumeneurs la nuict passée aveq quelques mil chevaulx en 300 fuzeliers, mais s’en est retourné aujourd’huy sans aucune rencontre, si ce n’est de quelques gens libres sorties de Gant, qui luy ont dit qu’à la ville il y avoit bruict que Mardijck auroit capitulé, qui ne semble pour encor fort vray semblable, quoyque ces changemens peuvent arriver soudainement. Au moins la nouvelle de la reprise de nos fregattes se trouve fausse et cela donne subject d’en bien espérer. Il a esté escrit à Monsieur le Mareschal de Grammont, qu’après ceste affaire vuidée on le viendra guérir, de sorte qu’il s’en asseure tant que nous le souhaittons. J’espère que Son Altesse rendra elle-mesme compte à Vostre Altesse de ce qui se passe icy et ne souffre pas que j’en discourre.
J’alloy enfermer icy une lettre de Son Altesse escritte ceste après-diner, mais voyci qu’on me la redemande sur le soir, Monsieur de Heenvliet et Breda venant d’arriver. Je tiendray celle-cy ouverte pour veoir si Son Altesse m’ordonnera d’y joindre quelque dépesche ceste nuict, car elle dispose fort indifféremment du jour et du ténèbres.
Monsieur le Comte Henri s’est trouvé ceste nuict si franq de sa fièbvre qu’il a résolu du remettre le voyage de La Haye, auquel il s’estoit préparé. Monsieur de Gleser, au contraire, n’y ayant pas voulu entendre jusques ores, s’est faict transporter en son bateau aujourd’huy où le vent contraire et fort l’incommoda, car quelque bien qu’aille sa playe la fièbvre ne le quitte pas jamais.
Il vient icy un bruict hier que la garnison et bourgeoisie de Berghes avoit esté une nuict en armes sur des advis qu’il y avoit que 2.000 hommes des enemis avoyent passé le port d’Anvers et estoyent entrez à Santfliet, où la porte avoit esté fermée sur eux, et quoyque le Commandeur n’en eust jamais donné advis, qu’aussi Son Altesse fut informée qu’il y avoit desjà 4 jours depuis ceste alarme, elle n’a pas voulu laisser d’y envoyer en grande haste 4 compagnies d’infanterie et, qui est plus estrange, trois de cavallerie. Je suis en tout cas bien ayse que l’enemi s’apperçoive qu’on s’y doubte de quelque chose, ayant souvent adverti Son Altesse de bonne main qu’il se brasse quelque vilainie dans ceste ville qui debvoit esclatter quand nous serions engagez par deçà l’eau.
Un des Estats (je nomme mon auteur, pour n’avoir autre information de ce qu’il débite) vient de me dire qu’en Zélande les Estats s’estant assemblez comme Vostre Altesse sçait sur le faict de la trefve. Le peuple se seroit souslevé à raison de la signature de Monsieur Knuyt. Son Altesse s’estonne de ce que depuis son départ d’icy il n’a mandé aucun mot de ce qui s’y est passé (car on dit que l’assemblée s’est desja séparrée) et luy en a escrit par exprès ceste nuict passée. Monsieur Verstraten a assisté aujourd’huy au disner de Son Altesse, qu’il me dit avoir esté assez bon.