Registers van de Hollandse grafelijkheid 1299-1345

Graaf Willem III schenkt Jan Oudijnsz. het nader omschreven land in vrij eigendom dat hem was toegevallen van heer Pieter Kempe, en dat Jan had gekocht.

De onderstaande tekst is gebaseerd op afschrift B.

Wi Willaem^a grave van Henegouwen^b, van Holland^c etc. maken kont allen luden dat die vierdalf acker lands, een zeventiende^d deel van enen halven acker min, die seren Pieters Kempen^e waren ende Hughen sinen broeder hadde ghegheven bi zinen vrien wille, ende die gheleghen sijn tusken Vranken Heynen soens land an die enen zide ende Gheraerds^f Vranken soens land an die ander zide in onsen ambocht tote Haeswaerdwoude, an ons ghecomen sijn met allen rechte dat recht es na den rechte van den rechte alse overmids broeke ende misdaet die here Pieter voerseyd ende Hughe sijn broeder jeghens ons hadden ghedaen, wilc land also heel alst gheleghen es in den ambocht voerseyd Jan Oudijns sone ghecoft hevet tyeghens heren Heynric Spiker^g, provisoer ende deken van Rijnland^h, ende tieghens Enghebrecht van Voerscoten, onsen renthemeyster van Noirdhollandⁱ, alse van onsen weghen; waer omme dat wi den voerseyden Janne Oudijns sone met deser lettre ene vrie ghifte gheven van den voerseyden lande, ende hem te waren ende sinen nacomelinghen te mans leven ende te lands leghere, alsmen een vri erve dat eyghen es scoudich es te waren, sonder al arghenlist.

Ende omme dat wi willen dat alle dese voerscreven reden stade ende vast bliven ewelike van ons ende van onsen nacomelinghen, so hebben wi dese lettre open bezeghelt met onsen zeghele. Ghegheven int jaer ons Heren M CCC ende twintich des donresdaghes na onser Vrouwen daghe te midden oeste.