Registers van de Hollandse grafelijkheid 1299-1345

Graaf Willem III doet uitspraak in het geschil tussen enerzijds abt en convent van Egmond en anderzijds Nicolaas van Abbenbroek vanwege diens echtgenote Adelise Jansdr. van der Mije, betreffende een goed dat Jan van der Mije in leen hield van de abdij.

Willem grave etc. maken cond etc. dat wi van alsulken twye alse die ..abt^c ende tgoids huys van Egmonde up die ene syde ende Clays van Abbenbroec van Adelissen sijns wives weghen, Jans dochter van der Mye, up die ander zyde onderlanghe hadden om alsulc leen goed alse Jan van der Meye vors. helt van den goidshuze van Egmonde^d, des si van beyden syden ane ons bleven, onse segghen darof uten: in den eersten zal Adelisse jof Clays^e vor hore med tueen des goidshuys manne van Egmonde hor houd doen dat si van rechte leen volgher es van den goede vorscreven, ende des houds te doene heeft hor die ..abt om vrienscap om bede van ons ende van goiden luden verdraghen. Vort vor die hereghewade ende hor brieve te gheven so sal die abt up bueren die heele rente van al den leengoide vorscreven van desen naisten jare toe comende. Ende hier bi heft die abt ^f Claise^g vors. tot Adelissen sijns wives behouf dit goed verlied te leene te houden in manieren dat na Adelissen doit comen zal up hor kindere, ist zone ist dochtere ware ghien sone, ende van den broeder up den broeder, ende van den broeder up der zuster, ende van der zuster^h up der zuster dar si storven sonder wittighe gheborte, ende also vort van kinde te kinde wittelic ghecomen van Adelissen live vorscreven, niet ant goids huys vors. te versterven alse langhe alze zone jof dochter jof suster jof broeder levet alse voirscreven es.

In orkonde etc. Ghegheven in den Haghe des sonnendaghes vor der Elf dusend magheden dach int jair ons Heren M^o CCC XXXIII^o.