Registers van de Hollandse grafelijkheid 1299-1345

Graaf Willem III verkoopt Pieter Allarde van Vlissingen een aantal nader omschreven percelen en lenen, met bepaling dat hij die binnen twee jaar mag terugkopen voor dezelfde som.

Wanneer de correctie in de datering in B ongefundeerd mocht zijn, en dus dach gelezen moet worden in plaats van avond, is de oorkonde op 28 oktober te plaatsen.

Vgl. nr. ZE 69.

De onderstaande tekst is gebaseerd op afschrift B.

Wi Willaem^a grave van Henegouwen^b etc. maken cond allen luden dat wi vercoft hebben bi Vrederic^c onsen rentemeester van Zelland^d Pieter Alaerde van Vlissinghen omtrend onser Vrouwen lichtmisse int jaer ons Heren M^o CCC ende neghentiene^e twie ghemete ende hondert roeden lands in Vlissinghe daer Alaerd^f Pieters sone op wonet, elc ghemet om twaelf scellinghe grote, dat coemt acht ende twintich scellinghe grote; item in Soekijns hem^g vier morghen ende een half vierendeel, tghemet twaelf scellinghe grote, dat coemt neghen ende viertich^h scellingheⁱ ende zes penninghe grote; item derdalf ghemete ende twintich roeden die Symon Oudekijn ghegheven hadde toet sinen live, tghemet twaelf scellinghe grote, dat coemt^j dertich scellinghe neghen penninghe ende een hallinc grote; item in Wille Doedijns^k soens hofstede een^l ghemet vijftich roeden min^m, tghemet vijf ende twintich scellinghe grote, dat coemt twintichⁿ scellinghe ^o ende tien penningh groete; item in Stienputs moet^p twie ghemete een half^q vierendel min, tghemet vijf ende twintich scellinghe grote, dat coemt zes ende viertich scellinghe tien penning ende een halling grote; item soe ghecoft^r hi neghen ghemete liens^s die Condebarens^t waren, waer of vallen in Stienputs meet zeven vierendeels^u lands ende een half, die hi coft^v elc ghemet om vijf ende twintich scellinghe grote, dat coemt zes ende viertich scellinghe tien penning ende een halling grote; ende aldus bliver van den neghen^w ghemete liens zeven ghemete ende een half vierendeel die Pieter voirs.^x cofte, elc ghemet om twaelf scellinghe grote, dat coemt vier pond zeven scellinghe ende drie halling ^y grote; item in die Pelkel een half ghemet om twaelf scellinghe ende zes penninghe grote; ende al dit coemt in summe zestien pond ende dertich penninghe grote, die hi vol ende al betaelt hevet, daer ons onse rentemeyster voerscreven goede rekeninghe of doen zal. Ende waer dat zake dat wi dit voerseyde land lossen wilden binnen twien jaren van der tijt dat hijt cofte ende voerscreven es, soe souden wijt moghen lossen omme die voernoemde summe van den ghelde voers.; ende lossendent wi^z niet binnen twien jaren van der voerscreven tijd, soe sal Pieter voers. dit voirnoemde land houden ende besitten in vrien eyghendoem, sinen vrien wille mede te doene als met sinen anderen erve.

In orkonde etc. Ghegheven int jaer ons Heren M CCC ende twintich op sinte Symon ende Juden avond^a'.