Registers van de Hollandse grafelijkheid 1299-1345

Schepenen, burgemeesters en gemene Raad van de poort van Middelburg herstellen de begijnen ter plaatse, die door een decretale van de paus ten onrechte beschuldigd waren van ernstige tekortkomingen, in hun vroegere rechten en bezittingen, en bepalen dat de meestersen van het hof zullen worden bijgestaan door vier mannen, twee aangesteld door de graaf en twee door de schepenen, die tevens jaarlijks haar rekeningen zullen afhoren.

Vgl. nrs. ZE 440 en 452.

Allen den ghenen die desen brief zullen sien jof horen lesen, scepene ende borghermeystere ende ghemene Raet van der poirte van Middelburch^c saluyt met kennessen der warheden. Want wilenneer^d een decretael quam van onsen heylighen vader den paus^e van Rome sprekende van dien beghinen als dat si niet meer wesen en souden om menigherande zuaer ghebrec dat hem dair of te voren quam, ende want die beghinen van Middelburch^f van zulken ghebreke onsculdich zien ende waren ende met onrechte bi dien decretale bezuaert hebben ghewest in menigherande manieren, ende onse ghestelike vader die biscop van Utrecht ende onse lieve here die grave van ^g Holland^h ter warheyden verstaen hebben dat onse heylighe vader die pawes wel verclaerst heeft endeⁱ gheopenbaert dat hi met dien voirnoemden decretale niet en wouden^j onsculdighe persone alse dese sijn te bezuaerne ende wille dat si voirt Gode dienen moghen in payse^k ende in rusten ende sonder moynessen, hier om zo willen onse gheestelike vader die biscop van Utrecht ende onse lieve here die grave voirs. met onsen vader den pawes, ende wi met hem allen, dat die beghinen in Middelburch^l bliven in allen manieren van vrihede ende bescerme als si te voren waren, ende Gode dienen in heersaemheyt der heyligher kerke, in oitmoedicheden ende in behoetheden als si te voren deden. Ende om dat si te^m bet ghevordertⁿ worden, zo zullen si dien joncfrouwe dien thof bevolen^o wart alle des goeds datten hove behoirt vrieliken ghebruken als sijs voirmaels plaghen te brukene doe si in goeden rusten waren, ende dat sonder weder segghen^p van ons ende van onsen nacomelinghen; het en waer dat zake dat si hier namaels bi der heyligher kerke met rechte van der beghijnscap gheset worden, so souden wi onse hand slaen ane den gode ^q voirscreven met onsen hantveste die wi dair of hebben, ghelike dat wi nu deden. Ende hier bi zullen ^r si alsulke alemossen gheven van den goede voirs. als hoir wille was der goeder lude dier tgoed toe ghegheven hebben^s, ende alsulc goed ende alemossen dair of ghaen als dair op staet bi wien dat vercreghen es. Ende hier bi zo zullen wesen van ons lieves heren sgraven weghen voirs.^t twie manne die hi dair toe setten zal ende twie manne diere scepen voirs. toe setten zullen, die die^u joncfrouwen die gheset worden dien hof te berechten starken, helpen ende vorderen zullen zo waers te doene es; ende die joncfrouwen zullen jaerlix van den goede voirscreven rekeninghe doen voir die vier persone voirscreven als sijs vermanen; ende waer dat sake dat in diere rekeninghe enich ghebrec^v ware jof varsumet^w van alemossen te gheven jof van anderen saken, dat souden si verbeteren bi desen vieren personen voirscreven. Ende alle stucken voirscreven sonder arghenlist.

Ende omme dat wi willen dat alle stucken voirscreven vaste ende ghestade bliven, zo hebben wi desen brief open bezeghelt met onser ghemeenre^x poirte zeghel. Ghegheven in Middelburch^y des woensdaghes na Paisken int jaer ons Heren M CCC zeven ende twintich.