Registers van de Hollandse grafelijkheid 1299-1345

Graaf Willem III verkoopt aan een aantal bij naam genoemde Dordtse poorters de overmaat gelegen aan hun goederen te Wieldrecht, zowel vrij eigendom als leen.

Wi Willaem^b grave van Heynnegouwen^c etc. maken cond allen luden^d dat wi bi rade ons Raeds vercoft hebben onsen poirteren die nu poirters sijn ende ghewest hebben in onse stede te Dordrecht^e, dair die nameliken hier nae of ghescreven staen, ende arve ligghende hebben tote Wieldrecht, eyghen of leen, in den eersten Jans Riken kindere^f viere: Jan, Gheraerd, Everwi ende Lizebet, Jacop^g Stevens sone, Pouwels Hughen soen, Steven Arnouds sone, Michiel Pouwels soen, Batte Arnouds Witten^h wedue, Gheraerd die Jonghe Coppepijnⁱ Gheraerds soen, Symon Wonnen soen, Pieter Stevens soen, Aernoud^j Rembouds soen, Jan die Scoemaker, Gheraerd Snoec, Florens van der ^k Timpel, Jan heren Hughen soen, Costijn die Roede, Arnoud Boudijns sone, Willaem die Volre, Heinrijc^l Maleghijs, Jacob Wonnen soen, Heynekijn Heyne Costijns soens kind, Hanne Banoc Hannekijn Jacobs soen, Hughe Nyclaus^m soen, Hannekijn Hughen soen, Ghene van Willpenⁿ, Willaem^o die Slechte, Gheraerd Boudijns sone, Badeloeghe^p Jan Moederkijn soens^q wedue ende hoir kinderen die si hadde bi Janne Moederkijn voirseyt, Lizebet Willaem Baertoud soens wedue ende hoer kinderen die si hadde bi Willaem^r voirs., ende Remboud Coeman, alle onse over mate die bi Janne heren^s Gillijs sone onsen rentemeister van Zuytholland^t ende van onsen weghen ghemeten es ende an horen lande gheleghen es, eyst ane eyghen jof ane liene, tote haren vryen eyghendom, bede boven den weghe ende beneden den weghe, elke marghen omme dartich scellinghe Hollansche; ende hier of hebben si ons betaeld den eersten penninc ende den lesten. Hier bi soe beloeven wi hem alle onse over mate voirnoemd te waerne alse een vry eyghen erve, ende sonder dijc, ende sonder alrehande arghenlist.

In orkonde desen brieve bezegheld med onsen zeghel. Ghegheven int jaer ons Heren M^o CCC^o acht ende twintich des vriendaghes nae sinte Lucyen^udaghe.