Registers van de Hollandse grafelijkheid 1299-1345

Graaf Dirk van Kleef verkoopt graaf Willem III al zijn bezittingen in het land van Altena, ontslaat heer Willem heer van Horn en Altena, de huidige leenman van die goederen, van de leenband met hem en beveelt hem graaf Willem manschap te doen; de oorkonde wordt medebezegeld door enkele met name genoemde leenmannen van graaf Dirk, die als getuigen optraden bij de rechtshandeling.

De nrs. ZH 435-439 in het register Zuidholland vormen een dossier in verband met de verkoop van Altena aan graaf Willem III, waarin opgenomen de bij die gelegenheid opgemaakte oorkonden alsmede de overgegeven retroacta.

Wi Diederic^a grave van Cleve maken cond ende kenlic etc. dat wi voir ons ende voir onse nacomelinghe vercoft hebben ende vercoepen eenen hoeghen edelen manne, onsen lieven neve heren Willame^b grave van Heynnegouwen^c etc., hem ende sinen nacomelinghen alle die heerlichede ende gherechte, manscap ende goede, soe wair si gheleghen sijn ende in wat manieren die wi hebben jof hadden an den heerlicheden, gherechte^d, manscap ende goeden an den lande van Altena alsoe als wise hebben ende si ons ane ghecomen sijn van onsen voirvoirders mid allen hoiren toe behoiren ende in alle den rechte, alsoe als hair Willem here van Hoirne ende van Altena die nu es ende sine voirvoirders van ons ende van onsen voirvoirders ghehouden hebben ende houd, wair bi dat wi heren Willame^e here van Hoirne ende van Altena voirscreven ende sine nacomelinghe voir ons ende voir onse nacomelinghe quite ghescouden hebben ende quite scelden van allen manscippen, eeden ende verbinde die hi ende sine voirders ons ende onsen voirders ghedaen hebben alse van der heerlicheden, gherechte, manscap ende goede van den lande van Altena voirscreven, toit ons liefs neven behoef heren Willame^f grave van Heynnegouwen^g ende^h van Holland^{i j} voirs. ende sinen nacomelinghe; ende ombieden heren Willame^k here van Hoirne voirs. ende sine nacomelinghe dat si van desen daghe voirt onsen lieven neve heren Willame^l grave van Heynnegouwen^m ende van Hollandⁿ voirs. ende sinen nacomelinghe doen alsulke manscip, trouwe ende verbint alse hi ende sinen voirders ons ende onsen voirders ghedaen ende gheloeft hebben, sculdich waren te doene ende verbonden waren. Ende hier bi hebben wi opghedraghen ende draghen op, ende hebben quite ghescouden ende scelden quite voir ons ende voir onse nacomelinghe toit ons liefs neven behoif heren Willame^o des graven van Heynnegouwen^p ende van Holland^q voirs. ende sinen nacomelinghen alle die brieve ende alle die voirwairden die wi of onse voirders ghehad hebben of hebben tote dien dach van huden sprekende van den heerlicheden, gherechten, manscippen ende goeden van den lande van Altena voirs., in wat manieren ende in wat steden dat si gheleghen sijn, ende hebben ons verbonden ende verbinden ons in goeden trouwen ende onse nacomelinghe van desen daghe voirt mid gheenrehande brieven te behelpen, of maghen behelpen noch niemant van onser weghen, die wi nu hebben of hier namails vercrighen moghen sprekende van den heerlicheden, gherechten, manscippen ende goede van den lande van Altena voirnoemd, die jeghens dese voirscreven voirwairden draghen moghen in eenigher manieren.

Ende omme dat wi willen dat alle dese voirscreven voirwairden vaste ende ghestade ghehouden worden van ons ende van onsen nacomelinghen onsen lieven neve heren Willame^r grave van Heynnegouwen^s ende van Holland voirs. ende sinen nacomelinghen, soe hebben wi desen brief open beseghelt mit onsen groeten seghele. Ende hier over ende ane waren onse ghetrouwe manne hair Rutgair van den Bocelair^t, hair Elbairt van Eyle, hair Jan van der Straten, riddere, Jan Leckere^u, Luysse van Honepel ende Diederic van der Straten, knapen, dien wi ghebeden hebben dat si desen brief mede beseghelen willen mid hoiren seghelen. Ende wi Rutghair^v van der Boetselair, Elbairt van Eyle, Jan van der Straten, ridderen, Jan Leckere^w, Luysse van Honepel ende Diederic van der Straten, knapen voirnoemd, omme dat wi over alle dese voirwairden voirscreven waren bi onsen lieven ^x here den grave van Cleve voirnoemd, soe hebben wi omme sire bede willen onse seghelen mede ghehanghen an desen selven openen brief. In kennissen der wairheit ghegheven ende ghedaen te Cleve int jair ons Heren M CCC XXXII des sonnendaghes na sente Martijns^y dach in den winter.